އަންނަ މަހު ބޭއްވުމަށް ހަމަޖެހިފައި އޮތް ޒުވާނުންގެ އިނާމު ދިނުމުގެ ޖަލްސާ (ޒުވާނުންގެ އެވޯޑް) ފަސްކޮށްފިއެވެ.

ޒުވާނުންގެ އިނާމު ދިނުމުގެ ޖަލްސާ ވެސް ފަސްކޮށްފައި ވަނީ ސަރުކާރުން ދައުލަތުގެ ހަރަދު ކުޑަ ކުރުމުގެ ގޮތުން އަޅާ ފިޔަވަޅެއްގެ ގޮތުގައެވެ.

ޒުވާނުންގެ ދުވަސް ފާހަގަކުރުމުގެ ގޮތުން ބާއްވާ މިޖަލްސާ މިހާރު ފަސްކުރި ނަމަވެސް ފަހުގެ ތާރީހެއްގައި ބާއްވާނެ ކަމަށް ޔޫތު މިނިސްޓްރީ އިން ބުނެފައިވެއެވެ.

Advertisement

ޔޫތު މިނިސްޓްރީން މިހަފްލާ ފަސްކޮށްފައިވާކަން ހާމަކުރުމުގެ ކުރިން ކުޅިވަރާ ބެހޭ ވުޒާރާއިން ވަނީ ކުޅިވަރު އެވޯޑު ހަފްލާ މި އަހަރުގެ ފަހުކޮޅަށް ފަސްކުރިކަމަށް ބުނެފައެވެ.

އެމިނިސްޓްރީން މިދިޔަ މަހުގެ ފަހުކޮޅު ނެރެފައިވާ ނޫސްބަޔާނެއްގައި ބަޔާންކޮށްފައިވާ ގޮތުގައި މި އަހަރުގެ ފަހުގެ ދުވަހަކަށް އެވޯޑު ހަފްލާ ފަސްކުރަން ނިންމީ ދައުލަތުގެ ހަރަދުތައް ކުޑަކުރުމަށް ރައީސް ޑރ. މުހައްމަދު މުއިއްޒު އެޅުއްވި ފިޔަވަޅުތަކުގެ ސަބަބުން ކަމަށާއި، އެވޯޑު ހަފްލާ އާ ގުޅުންހުރި ފަރާތްތަކަށް ހިއްސާކޮށްފައި ވާނެ ކަމަށެވެ.

މިދިޔަ ބުރާސްފަތި ދުވަހުގެރޭ އެކްސްގައި ކުރެއްވި ޕޯސްޓެއްގައި ރައީސް ޑރ. މުޢިއްޒު ވަނީ ދައުލަތުގެ ހަރަދުތައް ކުޑަކުރުމަށްޓަކައި ގިނަ ފިޔަވަޅުތަކެއް އަޅަން ނިންމާފައި ވާކަން ހާމަކޮށްފައެވެ. އެގޮތުން ދައުލަތުގެ ހަރަދުތައް ކުޑަކުރުމަށްޓަކައި ސިޔާސީ މަގާމުތައް މަދުކޮށް އެކި ހަފްލާތަކަށް ކުރާ ހަރަދުތައް ކުޑަކުރާނެ ކަމަށް ވެސް ބަޔާންކޮށްފައެވެ.