މާލޭގެ އެޕާޓްމަންޓެއްގެ ތެރެއިން ގިނަ އަދަދެއްގެ މަސްތުވާތަކެއްޗާއިއެކު ދިވެހި 3 ފިރިހެނުންނާއި 18 އަހަރުގެ ދިވެހި އަންހެންކުއްޖަކު ހައްޔަރުކޮށްފިއެވެ.

މޯލްޑިވްސް ޕޮލިސް ސަރވިސްއިން ހިންގި އޮޕަރޭޝަނެއްގައި މަސްތުވާތަކެތީގެ ވިޔަފާރީގައި ބޭނުންކުރާ އާލާތްތަކާއިއެކު ރަބަރު ޕެކެޓްގައި ބަންދުކޮށްފައިހުރި ގިނަ އަދަދެއްގެ މަސްތުވާތަކެއްޗާއެކު ހައްޔަރުކޮށްފައިވަނީ ގއ. ކޮލަމާފުށީ ސޯސަންގޭ އިބްރާހިމް ޒާއިދު ހަބީބު(28އ) އާއި ނ.ވެލިދޫ އަލިގާ އަބްދުﷲ ރިފާސް މުޙައްމަދު (20އ) އއ. ތޮއްޑޫ މުސްތަރީގޭ އިބްރާހިމް މައިޝަމް މާހިރު (20އ)ގެ އިތުރުން ވ. ކެޔޮދޫ ހެޕީނައިޓް އާއިޝަތު ޝިފުނާ ހުސައިން (18އ) އެވެ.

ގިނަ އަދަދެއްގެ މަސްތުވާތަކެއްޗާއި އެކު ހައްޔަރުކޮށްފައިވާ މިހަތަރު މީހުންގެ ބަންދާއިމެދު ގޮތެއް ކަނޑައެޅުމަށް ކްރިމިނަލް ކޯޓަށް ހާޒިރު ކުރުމުން ކޯޓުން ވަނީ ހަތަރު މީހުންގެ ބަންދަށް 5 ދުވަސް ޖަހާފައެވެ. ހައްޔަރު ކޮށްފައިވާ ހަތަރު މީހުންގެ ތެރެއިން ތިން މީހުންގެ ކުޑަކަމުދާ ތަކެތި މަސްތުވާތަކެތީގެ ބާވަތެއްކަމުގައިވާ ޓީއެޗްސީއަށް ޕޮޒިޓިވް ވެފައިވާކަމަށާއި މިހަތަރު މީހުން ދޫކޮށްލައިފި ނަމަ މުޖުތަމަޢުގެ ސަލާމަތަށް ނުރައްކާވެދާނެކަމަށް ކޯޓުއަމުރުގައި ބުނެފައިވެއެވެ.

Advertisement

މި އޮޕަރޭޝަން ހިންގާފައިވަނީ އިބްރާހިމް ޒައިދު ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާކަމަށް ފުލުހުންގެ އިންޓެލިޖެންސަށް ލިބުނު ރިޕޯޓަކާއި ގުޅިގެންކަމަށް ބަންދާމެދު ގޮތެއް ނިންމުމަށް ކްރިމިނަލް ކޯޓުގައި ބޭއްވުނު އަޑުއެހުމުގައި ފުލުހުން ބުނެފައިވެއެވެ.

އިބްރާހިމް ޒައިދުއަކީ ފުލުހުންގެ ޑްރަގް އެންފޯސްމެންޓް ޑިޕާޓްމަންޓް، ޑްރަގް އިންޓެލިޖެންސް، މެރިން ޕޮލިސް އަދި ފޮރެންސިކް ފުލުހުން ގުޅިގެން 2021 ވަނަ އަހަރު ހިންގި ބޮޑު މަސްތުވާތަކެތީގެ އޮޕަރޭޝަނުގައި އިބްރާހިމް ޒައިދު ހައްޔަރުކޮށްފައިވެއެވެ. އަދި މިމައްސަލާގައި ހިމެނޭ އެހެން މީހަކުވެސް ވަނީ މަސްތުވާތަކެތީގެ މައްސަލައެއްގައި ހައްޔަރުކޮށް، ޝަރީޢަތް ނިމެންދެން ބަންދުކޮށްފައެވެ.