ދުންފަތުގެ ބާވަތްތަކާއި، ވޭޕް އަދި އެނާޖީ ޑްރިންކް އެތެރެ ކުރުމަށް ދެމުން ދިޔަ ލުއި ދިނުން ހުއްޓާލަން މޯލްޑިވްސް ކަސްޓަމްސް ސާވިސް އިން ނިންމައިފި އެވެ.

ކަސްޓަމްސްގެ ޑެޕިއުޓީ ޗީފް ސުޕްރިޓެންޑެންތް އަހްމަދު ނިޔާޒު ވިދާޅުވީ އާންމު ގަވާއިދަށް ގެނެވުނު އިސްލާހުގެ ތެރެއިން ދެ ބަދަލެއް ގެނައުމަށް ކަސްޓަމްސް އިން ނިންމާފައިވާ ކަމަށާއި އެގޮތުން ދުންފަތުގެ ބާވަތްތަކާއި، ވޭޕް އަދި އެނާޖީ ޑްރިންކް އެތެރެކުރުމަށް ދޭ އިނާޔަތް އަންނަ މަހުގެ އެއްވަނަ ދުވަހުން ފެށިގެން އުވާލަން ނިންމަފައިވާ ކަމަށެވެ.

ރާއްޖެއަކީ ސިއްހަތާއި ގުޅޭ އެކި މުއާހަދާތަކުގައި ސޮއި ކޮށްފައިވާ ގައުމަކަށް ވާތީ ދުންފަތުގެ އިސްތިއުމާލުކުރަން ބޭނުން ކުރާ ތަކެއްޗަށް އިސްތިސްނާ ދިނުމަކީ އެ މުއާހަދާތަކުން ބާރުއަޅާ ކަމެއް ނޫން ކަމަށް އަލިއަޅުވާލާ ނިޔާޒް ވިދާޅުވީ މި ބަދަލުގެ ދަށުން އިނާޔަތް ދިނުން ހުއްޓާލާ ތަކެތީގެ ތެރޭގައި ސިނގިރޭޓާއި، ވޭޕް، އެނާޖީ ޑްރިންކް، ޕްލާސްޓިކް ކޮތަޅު، ސިންގަލް ޔޫޒް ޕްލާސްޓިކް އަދި އެއްގަމު އުޅަނދު ފަހަރު ހިމެނެ އެވެ.

Advertisement

ކަސްޓަމްސްގެ އާންމު ގަވާއިދަށް ގެނެވުނު އިސްލާހުގެ ތެރެއިން ގެނެވޭ ދެވަނަ ބަދަލަކީ އަމިއްލަ ފަރާތްތަކުގެ ބޭނުމަށް ގެންނަ ތަކެތީގެ ޑިއުޓީ މާފު ކުރާ މިންވަރު 10،000 ރުފިޔާއަށް ބަދަލު ކުރުމެވެ. މިގޮތުން މި މަހުގެ އެއްވަނަ ދުވަހުން ފެށިގެން މި ބަދަލަށް އަމަލުކުރަން ވަނީ ފަށާފަ އެވެ.

މިބަދަލާއި ބެހޭ ގޮތުން ނިޔާޒު ވިދާޅުވީ ވިޔަފާރިތަކަށް މި އިނާޔަތް ކަނޑައަޅާފައި ނުވާ ކަމަށާއި ޑިއުޓީ މައާފްކުރާ އަދަދަށް ވުރެ ކުޑަ ނަމަވެސް މުދަލުގެ ބާވަތާއި އަދަދާއި އަގާއި ގެންނަ ނިސްބަތަށް ބަލާއިރު، އެއީ ވިޔަފާރި މުދަލުގެ ގޮތުގައި ގެނެވޭ ތަކެތި ކަމަށް ކަސްޓަމްސްއަށް ގަބޫލުކުރެވޭ ތަކެއްޗަށް އެ އިނާޔަތް ލިބުމުން އިސްތިސްނާވާނެ ކަމަށެވެ.