ޓީ-20 ވޯލްޑްކަޕްގެ ފައިނަލުން އިންޑިއާގެ ކްރިކެޓް ޓީމް ޗެމްޕިއަންކަން ހޯދުމުން، ރާއްޖޭގައި ކާމިޔާބީ ފާހަގަކުރުމަށް މަޓީ އާއި އެމްއެމްޕީއާރްސީ އިން އިންޑިއާގެ ކްރިކެޓް ޓީމަށް ދައުވަތު އަރުވައިފިއެވެ.

މިދިޔަ ހަފުތާ ބަންދުގައި ބާބަޑޯސްގައި ކުޅުނު ޓީ-20 ވޯލްޑް ކަޕް ފައިނަލުގައި ދެކުނު އެފްރިކާ ބަލިކޮށް އިންޑިއާ އިން ވަނީ 13 އަހަރަށް ފަހު ފުރަތަމަ ފަހަރަށް ވޯލްޑް ކްރިކެޓް ޗެމްޕިއަން ކަން ހޯދާފައެވެ.

އިންޑިއާގެ ކްރިކެޓް ޓީމުން އިންޑިއާގައި މިކާމިޔާބީ ކުލަގަދަކޮށް ފާހަގަކުރަމުންދާއިރު، މަޓީ އާއި އެމްއެމްޕީއާރްސީން ވަނީ އެޓީމަށް ކާމިޔާބީ ފާހަގަކުރުމަށް ރާއްޖޭގެ ރާއްޖޭގެ ގުދުރަތީ ރީތި މުއްސަނދިކަން ލިބިފައިވާ ގޮނޑުދޮށަށް އައުމަށް ދައުވަތު އަރުވާފައެވެ.

Advertisement

މިދިޔަ އަހަރު ރާއްޖެއަށް އެންމެ ގިނަ ފަތުރުވެރިން އައި ގައުމުތަކުގެ ތެރޭގައި އެންމެ ކުރީގައި އޮތް އެއް ގައުމަކީ އިންޑިއާއެވެ. އެހެންނަމަވެސް މި ސަރުކާރު ވެރިކަމަށް އައި އިރު، އިންޑިއާ ސިފައިން ބޭލުމަށް ކުރި ކެމްޕެއިންގެ ތެރެއިން ސޯޝަލް މިޑިއާގައި ދައުލަތުގެ އިސް މަގާމުތަކުގައި ތިއްބެވި ބޭފުޅުން އިންޑިއާގެ ބޮޑު ވަޒީރަށް ކުޑަ އިމީސްކޮށް ދެއްކެވި ވާހަކަތަކާ ގުޅިގެން މިއަހަރު ރާއްޖެއަށް އަންނަ އިންޑިއާ ފަތުރުވެރިންގެ އަދަދު ވަނީ ވަރަށް ބޮޑަށް ދަށަށް ގޮސްފައެވެ.

އިންޑިއާގެ ބޮޑުވަޒީރު ނަރެންދްރަ މޯދީ، ބޮޑު ވަޒީރު ކަމުގެ އައު ދައުރަކަށް ހުވާ ކުރުމަށްޓަކައި ރައީސް ޑރ. މުޢިއްޒު އިންޑިއާއަށް ކުރެއްވި ރަސްމީ ދަތުރުފުޅަށް ފަހު، އިންޑިއާ އާއި ރާއްޖޭގެ ގުޅުން ވަނީ އަލުން ބަދަހިވެފައެވެ.