ރައްޔިތުންގެ މަޖިލީހުގެ މެމްބަރުންގެ އަދަދު 77 އަށް ބަދަލުކޮށް ކުޑަ ކުރައްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ޕީއެންސީ ހަރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ ހަރަދު ކުޑަކުރުމަށް ކައުންސިލްތަކުގައި ތިއްބާވާ މެންބަރުންގެ އަދަދު މަދު ކުރުމުގެ އިތުރުން ރައްޔިތުންގެ މަޖިލީހުގެ ސައިޒު ވެސް ހަމަޔަކަށް އަޅުވަން ޖެހޭ ކަމަށެވެ.

މިހާރު މިދާ ގޮތަށް ދަންޏާ 100 އަށް ވުރެ ވެސް މައްޗަށް މެންބަރުންގެ އަދަދު އަރައިގެން ގޮސްދާނެ ކަމަށާއި މަޖިލީހުގެ މެންބަރުންގެ އަދަދު މަދުކުރުމަށް ޕީއެންސީގެ މެންބަރުން އަމިއްލަ އިސްނެންގެވުމަށް ގަރާރެއް ހުށަހަޅައި ހިޔާލު ހޯއްދަވާފައިވާ ކަމަކީ އެމަނިކުފާނު ވަރަށް އުފަލާއެކު ފާހަގަ ކުރައްވާ ކަމެއް ކަމަށް އެމަނިކުފާނު ވިދާޅުވިއެވެ.

Advertisement

މީގެއިތުރުން އާބާދީ ބޮޑުވެގެން ދާ މިންވަރަކުން މަޖިލިސް މެންބަރުންގެ އަދަދު އެއަށް ވުރެ ވެސް މައްޗަށް އަރާނެ ކަމަށާއި ނަމަވެސް އެއީ އެއްވެސް މާނައެއް ހުރިކަމެއް ނޫން ކަމަށް ރައިސް ވިދާޅުވިއެވެ.

ހަމައެއާއެކު މެންބަރުގެ އަދަދު ކުޑަކުރާއިރު މާ ކުޑަކޮށްލުމަކީ ވެސް ރަނގަޅުކަމެއް ނޫން ކަމަށާއި އެންމެ ރަނގަޅު ގޮތަކީ 77 ގެ ރޭންޖުގައި މެންބަރުން ހޮވުން ކަމަށް ރައީސް ވިދާޅުވިއެވެ.

ރައްޔިތުންގެ މަޖިލީހުގެ މެންބަރުންގެ އަދަދު 77 އަށް ދަށްކުރަން ރައީސް ނިންމާފައިވާ އިރު، މިހާރު މަޖިލީހުގައި ތިއްބަވަނީ 93 މެންބަރުންނެވެ. 19 ވަނަ މަޖިލީހުގައި 87 މެންބަރުން ތިބި އިރު، 18 ވަނަ މަޖިލީހުގައި 85 މެންބަރުން އަދި 17 ވަނަ މަޖިލީހުގައި ތިއްބެވީ 78 މެންބަރުންނެވެ.