ކޮރަޕްޝަނާއި ޚިޔާނާތުގެ ސަބަބުން ދައުލަތަށް ގެއްލުނު ފައިސާ އަނބުރާ ހޯދުމަށް ގާނޫނެއް ފާސް ކުރުމަށްޓަކައި އެސެޓް ރިކަވަރީ ބިލެއް އެކުލަވާލުމުގެ މަސައްކަތް ސަރުކާރުން މިހާރު ކުރަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ޕީއެންސީ ޖަގަހައިގައި މިރޭ ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ.

މިރޭގެ ޖަލްސާގައި ރައީސް ވިދާޅުވީ މިހާރު ގާނޫނުތައް ހުރިގޮތުން، ދައުލަތަށް ގެއްލުނު ފައިސާ އަނބުރާ ހޯދުމަށް ދަތިތަކެއް އެބަހުރި ކަމަށެވެ. އަދި ގެއްލުނު ފައިސާ ހޯދުމަކީ އެމަނިކުފާނުގެ ވައުދުފުޅަކަށް ވާއިރު، އެ ފައިސާ އަނބުރާ ހޯދުމަށް ގާނޫނެއް ފާސް ކުރުމަށްޓަކައި އެސެޓް ރިކަވަރީ ބިލެއް އެކުލަވާލުމުގެ މަސައްކަތް ސަރުކާރުން މިހާރު ކުރަމުންދާ ކަމަށެވެ.

"އަނެއްކާވެސް އެތައް ސަތޭކަ މިލިއަން ރުފިޔާއެއް ހަރަދުވަނީ. ދައުލަތުގެ ހަޒާނާއަށް އަނބުރާ ނުގެނެސްދެވޭ އެ ގެއްލުނު ފައިސާއެއް. ވައްކަންކުރި ފައިސާއެއް. އެކަން ނިމުމަކަށް ގެނެސްދޭނަން. މިގޮތުން އެސެޓް ރިކަވަރީއަށް ހާއްސަ ގާނޫނެއް އިރާދަކުރެއްވިއްޔާ ބިލެއް ތައްޔާރުކުރުމުގެ މަސައްކަތް ފެށިފައި މި ވަނީ. އެސެޓް ރިކަވަރީގެ ގާނޫނެއް ފާސްކުރަން މަޖިލީހަށް ހުށަހަޅާނަން،" ރައީސް ވިދާޅުވި އެވެ.

"ރާއްޖެއިން ބޭރަށް ގެންގޮސްފައި އެއްޗެއް ހުރިއްޔާ އެ ވެސް ހޯދުމުގައި މިހާރަށް ވުރެ ފަސޭހަ ވެގެންދާނެ." ރައީސް ވިދާޅުވިއެވެ.

ދައުލަތަށް ގެއްލުނު ފައިސާ އަނބުރާ ހޯދުމަށް އެކުލަވާލާ މިބިލުން ދައުލަތުގެ މުދާ ނަހަމަ ގޮތުގައި ވިއްކައި، ކުޑަ އަގުގައި ވިއްކައިގެން ފައިދާ ހޯދައި އެފަދަ ކަންކަން ކޮށްފައި ހުރި ފަރާތްތަކުގެ ކިބައިން އެ މުދާތައް ރިކަވާކޮށް، އެ ފައިސާއިން ފައިދާވާ ގޮތަށް ފައިސާ ހޯދޭނެ ކަމަށް ރައީސް ވިދާޅުވިއެވެ. އަދި އެގާނޫނު ފަރުވާ ކުރެވިގެން ދާނީ ރާއްޖެއިން ބޭރުގައި ރައްކާކޮށްފައި ހުރި ކަޅު ފައިސާ ވެސް ހޯދަން ފަސޭހަވާނެ ގޮތަކަށް ކަމަށްވެސް ރައީސް ވިދާޅުވިއެވެ.

"އޭރުން އިރާދަކުރެއްވިއްޔާ ހަމައެކަނި ރާއްޖޭގައި ވައްކަންކޮށްގެން ރައްކާކޮށްފައި ހުރި ފައިސާއެއް ނޫން، ރާއްޖެއިން ބޭރަށް ގެންގޮސްފައި އެއްޗެއް ހުރިއްޔާ އެ ވެސް ހޯދުމުގައި މިހާރަށް ވުރެ ފަސޭހަ ވެގެންދާނެ.” ރައީސް ވިދާޅުވި އެވެ.

އެމަނިކުފާނު އިތުރަށް ވިދާޅުވީ ރާއްޖޭގައި މިހާތަނަށް ހިންގި އެންމެ ބޮޑު ކޮރަޕްޝަންގެ މައްސަލަ ކަމަށްވާ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ހިޔާނާތުން ގެއްލުނު ފައިސާ ހޯދައި، ކުށްވެރިވާ މީހުންނަށް ހައްގު އަދަބު ދޭނެ ކަމަށާއި ކުރީގެ ސަރުކާރުތަކުން ކޮމިޝަންތައް ހަދައިގެން ހަރަދުތައް ކޮށްގެން އެ ފައިސާ އަނބުރާ ހޯދިފައި ނުވިޔަސް، އާ ގާނޫނާ އެކު އެކަމަށް ހާއްސަ މަސައްކަތްތަކެއް ކުރައްވާނެ ކަމަށެވެ.

"އެމްއެމްޕީއާރްސީގެ މައްސަލަ މީގެ ތެރެއިން ބަލާއިރު އެންމެ ބޮޑު މައްސަލައަކީ. އެ ވައްކަން ކުރި ފަރާތްތައް ދެނެގަނެ، އެއީ ކޮންމެ މީހެއްކަމުގައި ވިޔަސް އެމީހަކަށް ދޭންޖެހޭ ހައްގު އަދަބު މި ސަރުކާރުން ދީ އެ ފައިސާ ރައްޔިތުންނަށްޓަކައި ހޯދުމަށް ކުރަންޖެހުނު ކޮންމެ ކަމެއް ކުރާނަން،" ރައީސް ވިދާޅުވި އެވެ.