ގަލޮޅު ކަންމަތިން ބާރުގަދަ އަޑުފައްގަނޑެއް އިވި އެއްޗެއް ގޮވި ކަމުގެ ރިޕޯޓު ލިބުމުން އެމްއެންޑީއެފް އިން ބެލިބެލުމުން އެއީ ގޮވުމެއްގެ ސަބަބުން ހިނގި ހާދިސާއެއް ނޫންކަން ކަށަވަރުވެފައިވާ ކަމަށް މޯލްޑިވްސް ނެޝަނަލް ޑިފެންސް ފޯސް އިން ވިދާޅުވެއްޖެއެވެ.

ސޯޝަލް މީޑިއާގައި ބާރުގަދަ އަޑުފަށްގަނޑެއް އިވޭ ވީޑިއޯއެއް އާންމުވެފައިވާ އިރު، ގަލޮޅު ކަންމަތިން ބާރު ގަދަ އެއްޗެއް ގޮވިކަމުގެ މަޢުލޫމާތު ލިބުމާއި ގުޅިގެން ސިފައިނާ ފުލުހުން ވަނީ ހަތިޔާރާއެކު އެސަރަޙައްދުގައި ހަރަކަތްތެރިވެފައެވެ.

އެމްއެންޑީއެފުން މައުލޫމާތު ދެއްވި ގޮތުގައި ގަލޮޅު ކަންމަތީގައި ޕާކުކޮށްފައި އޮތް ވޭނެއްގައި އެއްޗެއް ގޮވިކަމުގެ ރިޕޯޓެއް ލިބުމުން އެފަދަ ކަންކަމުގައި އަމަލުކުރަމުން އަންނަ ޕްރޮސީޖާއާ އެއްގޮތަށް އަމަލުކުރި ކަމަށާއި މިހާތަނަށް ބެލިބެލުމުން އެއްވެސް ގޮވާ އެއްޗެއްގެ ނިޝާނެއް ފެންނަން ނެތް ކަމަށެވެ.

Advertisement

"މިއީ އެކްސްޕްލޯސިވްއެއްގެ ސަބަބުން ހިނގި ކަމެއް ނޫންކަން ވަނީ ކަށަވަރު ކުރެވިފަ. އަދި މިކަން ހިނގާފައިވަނީ ވެހިކަލްގެ ޓެކްނިކަލް މައްސަލައަކުން ކަމަށް ބެލެވޭތީ އެކަންކަން މޯލްޑިވަސް ޕޮލިސް ސަރވިސްއިން ދަނީ ބަލަމުން" އެމްއެންޑީއެފުން ވިދާޅުވިއެވެ.

މިހާދިސާގައި އެއްވެސް މީހަކަށް އަނިޔާ ލިބުނު ކަމުގެ ރިޕޯޓް ނުލިބޭ ކަމަށާއި ވޭނަށް ވެސް އެއްވެސް ގެއްލުމެއް ލިބިފައި ނުވާކަމަށް އެމްއެންޑީއެފް އިން ހާމަކޯށްފައިވެއެވެ.