ޔަމާލް ރެކޯޑް ހެދި މޮޅު ގޯލާއެކު ޔޫރޯ ފުޓްބޯޅަ މުބާރާތުގެ ފައިނަލުން ސްޕެއިން ޖާގަ ހޯދައިފި އެވެ. ސްޕެއިން މުބާރާތުގެ ފައިނަލުން ޖާގަ ހޯދީ 2-1 ން ފްރާންސް ބަލިކޮށްގެންނެވެ.

ސެމީފައިނަލް މެޗުގައި ފުރަތަމަ ލަނޑު ޖަހާ ކުރިހޯދީ ފްރާންސުންނެވެ. މެޗު ފަށައިގެން 8 ވަނަ މިނިޓްގައި ފްރާންސަށް ކުރި ހޯދައިދިނީ ކޯލޯ މުއާނީ އެވެ.

ޔޫރޯގެ ތާރީޚީ ރެކޯޑެއް މުގުރާލި ލަނޑުން ސްޕެއިންއަށް ނަތީޖާ ހަމަހަމަ ކޮށްދިނީ ލަމީން ޔަމާލް އެވެ. 16 އަހަރުގައި ޔަމާލް ޖެހި މިގޯލާއެކު އޭނާ އަކީ ޔޫރޯގައި ލަނޑު ޖެހި އެންމެ ހަގު ކުޅުންތެރިޔާ އެވެ. މިއީ ގައުމީ ޓީމަށް ޔަމާލް ޖަހައިދިން 3 ވަނަ ލަނޑެވެ. މިމެޗާ ހަމައަށް ޔޫރޯގައި ލަނޑު ޖެހި އެންމެ ހަގު ކުޅުންތެރިއަކީ ސްވިޒަރލެންޑްގެ ޖޯހަން ވޮންލަންތެން އެވެ. 18 އަހަރުގައި އޭނާ ވެސް ލަނޑު ޖެހީ ފްރާންސް ކޮޅަށެވެ. އެއީ 2004 ވަނަ އަހަރުގެ ޔޫރޯގައެވެ.

Advertisement

ނަތީޖާ ހަމަހަމަ ކުރިތާ އެންމެ ތިން މިނިޓްގެ ތެރޭގައި ސްޕެއިން އިން ވަނީ ލީޑް ނަގާފައެވެ. ސްޕެއިން އަށް ކުރި ހޯދައިދިނީ 25 ވަނަ މިނިޓްގައި އޮލްމޯ އެވެ.

 ފައިނަލްގައި ސްޕެއިން ވާދަކުރާނީ އިންގްލެންޑް ނުވަތަ ނެދަލެންޑްސްއާ އެވެ.