ދުނިޔޭގެ އެކި ސަރަހައްދުތަކުން އޭވިއޭޝަން ދާއިރާގެ އިސް މަންދޫބުން ބައިވެރިވާ އެއަރ ސަރވިސް ވޯލްޑް ކޮންގްރެސް ފަށައިފިއެވެ. އެއަރ ސަރވިސް ވޯލްޑް ކޮންގްރެސް ކުރިއަށް ގެންދިއުމަށް ހަމަޖެހިފައިވަނީ މިމަހުގެ 9 އިން 11 އަށް ކުރުނބާ މޯލްޑިވްސްގައެވެ.

ޖުމްލަ 27 އެއަރލައިން އަދި 17 އެއަރޕޯޓާއެކު ވައިގެ ސިނާއަތުގެ އެކި ފަންތީގެ ކުންފުނިތަކުގެ 150 އަށްވުރެ ގިނަ މަންދޫބުން މިކޮންގްރެސްގައި ބައިވެރިވެއެވެ.

އެއަރ ސަރވިސް ވޯލްޑް ކޮންގްރެސްގެ އެކި ހަރަކާތްތައް 3 ރިސޯޓެއްގަައި ކުރިއަށް ގެންދާނެއެވެ. އެގޮތުން ކޮންގްރެސްއަށް އަންނަ މަންދޫބުންނަށް މަރުހަބާ ކިޔުމަށް ބާއްވާ ޚާއްސަ އިވެންޓް، ޝެރެޓަން މޯލްޑިވްސް ފުލްމޫން ރިސޯޓް އެންޑް ސްޕާގައި ވަނީ އަންގާރަ ދުވަހު ހަވީރު ބާއްވާފައެވެ.

Advertisement

މި ހަފްލާގައި މޯލްޑިވްސް އެއަރޕޯޓްސް ކޮމްޕެނީގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު ވަނީ މިފަދަ ބައިނަލްއަޤްވާމީ ބައްދަލުވުންތަކުގެ މުހިއްމުކަމުގެ މައްޗަށް އަލިއަޅުއްވާލައްވާ ވާހަަކަދައްކަވާފައެވެ. އެގޮތުން ދާއިރާގެ ފަރާތްތަކުގެ ގުޅުންތައް ބަދަހިވެ، ގުޅިގެން ދުނިޔޭގެ އޭވިއޭޝަން ސިނާއަތް ކުރިއެރުވުމަށް މިފަދަ ބައްދަލުވުމުގެ ސަބަބުން ފުރުސަތު ފަހިވެގެންދާކަން ޝަރީފް ފާހަގަކުރެއްވިއެވެ.

ޝަރީފްވަނީ ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމަށް ކުރިއަށްގެންދާ މަޝްރޫޢާ ގުޅޭގޮތުންވެސް ވާހަކަދައްކަވާފައެވެ.

އެއަރ ސަރވިސް ވޯލްޑް ކޮންގްރެސް މިއަހަރު ރާއްޖޭގައި ބޭއްވުމުގެ ފުރުސަތު ލިބުނުކަން އިޢުލާންކޮށްފައިވަނީ މިދިޔަ އަހަރު ސެން ފްރެންސިސްކޯގައި ބޭއްވި ކޮންގްރެސްގައެވެ.

2010 ވަނަ އަހަރުންފެށިގެން ބާއްވަމުން އަންނަ މި ކޮންގްރެސް ވަނީ އެމެރިކާ، އިނގެރޭސިވިލާތް އަދި ދުބާއީގައިވެސް ބާއްވާފައެވެ.