އާރްޓީއެލް ފެރީގެ ޚިދުމަތް ނ. އަތޮޅުގައި ފެށުމަށް ތައްޔާރުވެއްޖެއެވެ. ނ.އަތޮޅުގައި އާރްޓީއެލްގެ ޚިދުމަތް ފެށުމަށްޓަކައި އެމްޓީސީސީއާ ހަވާލުކޮށްފައިވަނީ މިިދިޔަ އޭޕްރީލް މަހުގެތެރޭގައެވެ.

އާރްޓީއެލް ފެރީގެ ޚިދުމަތް ނ. އަތޮޅުގައި ފެށުމަށްޓަކައި މިހާރު އެއަތޮޅުގައި ޓެސްޓު ދަތުރުތައް ވަނީ ބާއްވާފައެވެ. މަދަނީ އުދުހުންތަކާ ބެހޭ ވުޒާރާއިން ވިދާޅުވީ ނ. އަތޮޅުގައި ފެރީގެ ޚިދުމަތް މިމަހު ފަހުކޮޅު ފެށުމަށް ނިންމާފައިވާކަމަށެވެ. ނ. އަތޮޅުގައި ދަތުރުކުރުމަށް ހަމަޖެހިފައިވަނީ 50 މީހުންގެ ޖާގައިގެ 2 ފެރީކަމަށް ދަތުރުފަތުރާ ބެހޭ ވުޒާރާއިން ވިދާޅުވެއެވެ.

އާރްޓީއެލް ފެރީތަކަކީ 30 ނޮޓްގެ ބާރުމިނުގައި ދުވާ ފެރީތަކެކެވެ. މި ފެރީތަކަކީ އެމްޓީސީސީން ކުރިން ބޭނުންކުރަމުން އައި ފެރީތަކުގެ ސްޕީޑަށްވުރެ 3 ގުނަ އަވަސް ފެރީތަކެއްކަމަށް އެމްޓީސީސީން ބުނެއެވެ.

Advertisement

ފަސޭހައިން އެއްރަށުން އަނެއް ރަށަށް ދަތުރުކުރެވޭނެ ޤައުމީ ފެރީ ނިޒާމެއް ޤާއިމުކުރުމަށް ރާއްޖެ 6 ޒޯނަކަށް ބަހާލައިގެން އަންނަނީ މަސައްކަތް ކުރަމުންނެވެ. މީގެ ދަށުން މިހާތަނަށް ހއ. އަތޮޅާއި، ހދ. އަތޮޅު އަދި ށ. އަތޮޅުގެ މީހުން ދިރިއުޅޭ ރަށްތަށް ފެރީ ނިޒާމުންވަނީ ގުޅާލާފައެވެ. އަދި ޅ. އަތޮޅާއި ހުވަދު އަތޮޅުގެ އިތުރުން އައްޑު އަތޮޅުގައިވެސް މިޚިދުމަތް ވަނީ ފަށާފައެވެ. އަދި ވަރަށް އަވަހަށް ރ.އަތޮޅާއި ބ.އަތޮޅުގައިވެސް މިޚިދުމަތް ފެށުމަށް އެމްޓީސީސީއާ ވަނީ ހަވާލުކޮށްފައެވެ.