މޯލްޑިވްސް މާކެޓިން އެންޑް ޕަބްލިކް ރިލޭޝާންސް ކޯޕަރޭޝަން (އެމްއެމްޕީއާރުސީ)ގެ ޑެޕިއުޓީ މެނޭޖިންގ ޑިރެކްޓަރުގެ މަގާމުން މުހައްމަދު ބައްސާމް އާދަމް އިސްތިއުފާ ދިނީ ހަރަދު ކުޑަ ކުރުމަށް ސަރުކާރުން ކުރާ މަސައްކަތުގެ ތެރެއިން ކަމަށް ބައްސާމް ވިދާޅުވެއްޖެއެވެ.

ބައްސާމް އެކްސްގައި ކުރި ޕޯސްޓެއްގައި ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން ހަރަދު ކުޑަކުރުމަށް ކުރައްވަމުން ގެންދަވާ މަސައްކަތުގެ ތެރެއިން އޭނާ މަގާމުން އިސްތިއުފާ ދިނީ ކަމަށެވެ. އަދި އެމްއެމްޕީއާރުސީގައި އޭނާ ހުންނެވި ދުވަސްވަރު ކުރެވުނު މަސައްކަތާއި މެދު ފަހުރުވެރިވާ ކަމަށާއި މުވައްޒަފުންގެ ދުޅަހެޔޮކަމާއި، ރާއްޖެ މާކެޓްކޮށް ކުރިއެރުވުމަށް ކުރެވުނު މަސައްކަތުގައި ލިބުނު އެއްބާރުލުމަށް ޝުކުރު އަދާ ކުރާ ކަމަށް  ބައްސާމް ވިދާޅުވިއެވެ.

އެމްއެމްޕީއާރުސީގެ އެންމެ ދަތި އުނދަގޫ ދުވަސްތަކުގައި ކުންފުނި ހިންގުމަށް ރައީސް މުއިއްޒު އޭނާއާއި މެދު އިތުބާރު ކުރެއްވި ކަމަށްޓަކައި ބައްސާމް ވަނީ ރައީސްއަށް ޝުކުރު އަދާ ކުރައްވާފައެވެ.

Advertisement

"އުންމީދު ކުރަނީ ކުރިއަށް އޮތް ތަނުގައި ވެސް އެއްބާރުލުންދީ، މި ސިނާއަތުގެ ކުރެވުމަށް އެހީތެރިކަން ފޯރުކޮށްދިނުން. ގައުމުގެ ކުރިމަގާއި ބޭނުންވާ ކަންކަން ހާސިލު ކުރުމަށް އެންމެން އެގައުމުގައި މަސައްކަތް ކުރަން ހިނގާ" ބައްސާމް ވިދާޅުވިއެވެ.

އެމްއެމްޕީއާރްސީގެ ގެ ޑެޕިއުޓީ މެނޭޖިންގ ޑިރެކްޓަރުގެ މަގާމުން ބައްސާމް އިސްތިއުފާ ދެއްވާފައިވާއިރު، އެމްއެމްޕީއާރުސީގެ ބޯޑުން އޭނާ މަގާމުން ވަކިކޮށް އެކަން އޭނާއަށް އަންގާފައިވާކަމަށް ސޯޝަލް މީޑިއާގައި ޚަބަރު ފެތުރިފައިވެއެވެ.