މުހިންމު ހަ މަހާސިންތާއެއް ބޭއްވުމަށް އިސްލާމިކް މިނިސްޓްރީން ނިންމައިފިއެވެ.

އިސްލާމިކް މިނިސްޓްރީން މިރޭ އިއުލާން ކޮށްފައިވާ ގޮތުގައި އެމިނިސްޓްރީން ހަ މަހާސިންތާއެއް ބޭއްވުމަށް ހަމަޖެހިފައިވާ ކަމަށެވެ. އެގޮތުން އެމިނިސްޓްރީން ބާއްވަން ހަމަޖައްސާފައިވާ ހަ މަހާސިންތާ އަކީ އިލްމުވެރިންގެ މަހާސިންތާ، ޖަމްއިއްޔާ މަހާސިންތާ، އިމާމުންގެ މަހާސިންތާ، ޒަކާތު މަހާސިންތާ، ހައްޖާއި އުމްރާ މަހާސިންތާގެ އިތުރުން ފަތުވާ މަޖްލީސް މަހާސިންތާ ކަމަށެވެ.

މީގެ ތެރެއިން އިލްމުވެރިންގެ މަހާސިންތާ ބާއްވަން ނިންމާފައިވަނީ އޮގަސްޓް މަހުގެ 24 ވަނަ ދުވަހު ކަމަށާއި، ޖަމްއިއްޔާ މަހާސިންތާ ބާއްވަނީ ސެޕްޓެމްބަރު ހަތަރު ވަނަ ދުވަހު ކަމަށް އެމިނިސްޓްރީން ހާމަކޮށްފައިވެއެވެ.

Advertisement

އަދި އިމާމުންގެ މަހާސިންތާ ސެޕްޓެމްބަރު މަހުގެ 21 ވަނަ ދުވަހު ބާއްވަން ހަމަޖެހިފައިވާއިރު، ޒަކާތު މަހާސިންތާ ބާއްވަން ހަމަޖެހިފައިވަނީ އޮކްޓޯބަރު މަހުގެ 26 ވަނަ ދުވަހު ކަމަށްވެސް އެމިނިސްޓްރީ ކުރި އިއުލާންގައި ބުނެފައިވެއެވެ.

ހައްޖާއި އުމްރާ މަހާސިންތާގެ އިތުރުން ފަތުވާ މަޖްލީސް މަހާސިންތާ ބާއްވާނެ ސީދާ ތާރީހެއް އަދި ކަނޑައަޅާފައި ނުވާއިރު، އެ މަހާސިންތާ ބޭއްވުމަށް ނިންމާފައިވަނީ އޮކްޓޯބަރު މަހާއި ނޮވެމްބަރު މަހުގެ ތެރޭގައި ކަމަށް އިސްލާމިކް މިނިސްޓްރީން ބުނެފައިވެއެވެ.