ތޫނު އެއްޗެހިން ހަމަލާދީ މަރާލި ހުސައިން ވަހީދުގެ މަރުގެ މައްސަލާގައި މަރަން ހުކުމް ކޮށްފައިވާ ކުއްޖާއަށް ހުސައިންގެ މަންމަ މައާފް ދިނުމުން އެ ކުއްޖާ މަރުގެ އަދަބުން ސަލާމަތްވެއްޖެ އެވެ.

ޖުވެނައިލް ކޯޓުން ވަނީ ޑިސެމްބަރު، 2013 ގައި މ. އައިޝާ ހުސައިން ވަހީދަށް ތޫނު އެއްޗެހިން ހަމަލާދީ މަރާލި މައްސަލާގައި ދެ ކުއްޖަކު މެރުމަށް ޙުކުމްކޮށްފައެވެ. ހައިކޯޓުން އެޙުކުމްއަށް ތާއިދު ކުރުމުން އޭގެ ތެރެއިން އެކަކު ވަނީ އެމައްސަލަ ސުޕްރީމް ކޯޓުގައި އިސްތިއުނާފް ކޮށްފައެވެ.

ޙުސައިންގެ މަރުގެ މައްސަލާގައި ޙުކުމްކޮށްފައިވާ ދެމީހުންނަށްވެސް މިހާރު 18 ފުރިފައިވީ ނަމަވެސް އެ މީހުންގެ މައުލޫމާތު އާންމު ކުރުމަކީ ކުޑަކުދިންގެ އަދުލުގެ ގާނޫނުގެ ދަށުން މަނާ ކަމެކެވެ.

Advertisement

މިމައްސަލަ ސުޕްރީމް ކޯޓުގައި އިސްތިޢުނާފު ކުރުމުން ސުޕްރީމް ކޯޓުން ބުނެފައިވަނީ މައްސަލަ އިސްތިޢުނާފު ކުރި ކުއްޖާ ޙުސައިންގެ މަންމަ ގާތުގައި މަޢާފަށް އެދުމުން އެ ކުއްޖާއަށް މައާފް ދޭން ބޭނުންވާ ކަމަށް ހުސައިން ވަހީދުގެ މަންމަ 2022 ވަނަ އަހަރު ސުޕްރީމް ކޯޓަށް ފޮނުވި ސިޓީއެއްގައި ބަޔާންކޮށްފައިވާ ކަމަށާއި، އިސްލާމީ ޝަރީއަތުގެ ދަށުން އެ ހާލަތުގައި މަރުގެ އަދަބު ނުދެވޭނެ ކަމަށެވެ.

ސުޕްރީމް ކޯޓުން މިމައްސަލާއިގައި ޙުކުމްކުރައްވަމުން ބުނެފައިވަނީ އިސްލާމީ ޝަރީއަތުގެ ދަށުން އެންމެ ވާރިސަކު މައާފް ދިން ނަމަވެސް ގާތިލަށް މަރުގެ އަދަބެއް ނުދެވޭނެ ކަމަށެވެ. އެހެންކަމުން އެ ކުއްޖާގެ މައްޗަށް ކަނޑައެޅި މަރުގެ އަދަބު ބާތިލްކުރީ ކޮށްފައިވާ ކަމަށާއި އެ ކުއްޖާގެ މައްޗަށް ގާނޫނީ ގޮތުން ދެން ކަނޑައެޅޭނެ ގާނޫނީ އަދަބަކާ މެދު ގޮތެއް ނިންމުމަށް ޖުވެނައިލް ކޯޓަށް އެ މައްސަލަ ތަހުވީލް ކުރުމަށް ސުޕްރީމް ކޯޓުގެ ފަސް ފަނޑިޔާރުން އިއްތިފާގުން ޙުކުމް ކުރެއްވީ ކަމަށެވެ.

ކުޑަކުދިންގެ އަދުލުގެ ގާނޫނު ދަށުން 18 އަހަރުން ދަށުގެ ކުއްޖަކަށް މަރުގެ އަދަބެއް ނުދެވޭނެ އެވެ. މިމައްސަލާއާއި ގުޅިގެން އެކުއްޖާ މަރުގެ އަދަބުން ސަލާމަތްވި ނަމަވެސް ގާނޫނީ އަދަބެއް ދިނުމުގެ ފުރުސަތު އޮންނާނެއެވެ.