ފްލެޓެއް ލިބިފައިވާ ކަމަށް ބުނެ އޮޅުވާލައިގެން އާންމު ފަރުދެއްގެ ބޭންކު އެކައުންޓުން ފަސް ލައްކައަށްވުރެ ގިނަ ރުފިޔާ ފޭރިގެންފިއެވެ.

ނޫސްވެރިންނާއި ބައްދަލުކުރައްވާ ވާހަކަ ދައްކަވަމުން އެންޓި ސްކޭމް ސެންޓަރުގެ ހެޑް އިންސްޕެކްޓާ އޮފް ޕޮލިސް މަރިޔަމް ރަޝީދާ ވިދާޅުވީ، ނުދަންނަ ނަންބަރަކުން އާންމު ފަރުދަކަށް ގުޅައިގެން ފަސް ލައްކައަށް ވުރެ ގިނަ ރުފިޔާ ފޭރިގަނެފައިވާ މައްސަލަ ފުލުހުންނަށް މިއަހަރުގެ ޖެނުއަރީ މަހުގެ 12 ވަނަ ދުވަހު ކަމަށާއި އެ ކޭސްގައި އެމީހާގެ އަތުން 587،149 ރުފިޔާ ފޭރިގެންފައިވާ ކަމަށެވެ.

މަރިޔަމް ރަޝީދާ  ހާމަކޮށްފައިވާ ގޮތުގައި އެކަން ކޮށްފައިވަނީ އެމީހާއަށް ގުޅައި ފްލެޓް ލިބިފައިވާ ކަމަށް ބުނެ އީމެއިލް އެޑްރެސްގެ މައުލޫމާތު ހޯދުމަށްފަހު، އެ މީހާގެ ފޯނު ނަންބަރު އީ-ސިމަކަށް ބަދަލުކޮށް އިންޓަނެޓް ބޭންކިންގް ކޮމްޕްރޮމައިޒްކޮށް އިންޓަނެޓް ބޭންކިންގެ އެކްސެސް ހޯދައިގެނެވެ. މިކަން މިގޮތަށްކޮށް އެމީހާގެ އެކައުންޓުން 25،000 ރުފިޔާއާއި އެމީހާގެ ބައިވެރިވުން އޮންނަ ޖަމިއްޔާގެ އެކައުންޓުން 562،000 ރުފިޔާ ނަގާފައިވާ ކަމަށް އޭނާ ހާމަކޮށްފައިވެއެވެ.

Advertisement

މިމައްސަލައިގައި މިހާތަނަށް އެކަކު ހައްޔަރު ކޮށްފައިވާއިރު، ފުލުހުން ހިންގި ތަހުގީގުން ސްކޭމް ޖެއްސި މީހާ ފޯނު ކޮށްފައިވަނީ އެދުވަހުގެ 14:03 އެހާކަންހާރުކަން އެނގިފައިވާ ކަމަށާއި، އެ މީހާއަށް ސިމް ކޮމްޕްރޮމައިޒްވެފައިވާކަން އެނގިފައިވަނީ އެދުވަހުގެ 14:53 އެހާކަންހާއިރު ކަމަށް އަދި އެހެން ކަމުން ބޭންކާއި މުއާމަލާތް ކުރެވި، އެކަން ހުއްޓުވިފައިވަނީ 15:53 ގައި ކަމަށާއި އެ މައްސަލަ ފުލުހުންނަށް ހުށަހަޅާފައިވަނީ 16:15 ގައި ކަމަށް އިންސްޕެކްޓަރ އޮފް ޕޮލިސް، ޝާން މުހައްމަދު ވިދާޅުވިއެވެ.

ޝާން އިތުރަށް ވިދާޅުވީ، ބޭންކަށް އެމައްސަލަ ހުށަހަޅައިގެން އެމީހާގެ 46 އިންސައްތަ ފައިސާ ސަލާމަތްވެފައިވާ ކަމަށާއި ޖަމިއްޔާގެ އެކައުންޓުން 42 އިންސައްތަ ސަލާމަތްވެފައިވާ ކަމަށެވެ. އަދި މި އެކައުންޓްތަކުން ފައިސާ ފޭރިގަންނަން ގާތްގަނޑަކަށް ހޭދަވެފައިވަނީ 1 ގަޑިއިރާއި 49 މިނެޓް ކަމަށް ވެސް އޭނާ ވިދާޅުވިއެވެ.

"މިކަމަކީ ގިނަ ބަޔަކު ގުޅިގެން ރާވައިގެން ހިންގާފައިވާ ކަމެއްކަން ތަހުގީގަށް ފާހަގަވެފައިވޭ." ޝާން ވިދާޅުވިއެވެ.

ޝާން ވިދާޅުވެފައިވާ ގޮތުގައި އެމީހާގެ އަތުން ފޭރުނު ފައިސާ އެކި އެކައުންޓްތަކަށް ގޮސްފައިވާ ކަމަށާއި ރާއްޖޭގެ 8 ސަރަހައްދެއްގައި ހުރި އޭޓީއެމަކުން ފައިސާ ނަގާފައިވާ ކަމަށެވެ. އަދި އެ ފައިސާގެ 19 އިންސައްތައިން ކްރިޕްޓޯ ކަރަންސީއާއި ފަސް ވިޔަފާރިއަކުން އިލެކްޓްރޯނިކް އަގުބޮޑު މުދާ ގަތުމަށް ހޭދަކޮށްފައިވާ ކަމަށް ވެސް ޝާން ވިދާޅުވިއެވެ. މީގެ އިތުރުން،  އެފައިސާ ބޭނުންނުކޮށް 18 އިންސައްތަ ފައިސާ އެ އެކައުންޓްތަކުގައި ފްރީޒް ކުރެވިފައިވާ ކަމަށް ވެސް ޝާން ވިދާޅުވިއެވެ.