އިންޑިއާގެ އެހީގައި ކުރީ ސަރުކާރުން މާލެ، ވިލިމާލެ، ގުޅިފަޅު އަދި ތިލަފުށި ގުޅުވާލުމަށް އަޅަންފެށި ތިލަމާލެ ބްރިޖް ޕްރޮޖެކްޓުގެ 40 ޕަސެންޓް މަސައްކަތް ނިމިފައިވާ ކަމަށް ކޮންސްޓްރަކްޝަން އަދި އިންފްރަސްޓްރަކްޗާ މިނިސްޓްރީން ބުނެފި އެވެ.

އެ މިނިސްޓްރީގެ ސްޓޭޓް މިނިސްޓަރު އިބްރާހީމް ތައާމު މުހައްމަދު ވިދާޅުވީ މިދިޔަ އަހަރުގެ ނޮވެމްބަރުގެ ނިޔަލަށް ބްރިޖުގެ 29 ޕަސެންޓް ނިމިފައިވާ ކަމަށާއި މިހާރު ބްރިޖުގެ 40.47 ޕަސެންޓް މަސައްކަތް ނިމިފައިވާ ކަމަށެވެ.

ފޮޓޯ: މިނިސްޓްރީ އޮފް އިންފްރާސްޓްރަކްޗާ

ތިލަމާލެ ބްރިޖުގެ މަސައްކަތް ސެޕްޓެމްބަރު 2026 ގެ ނިޔަލަށް ނިންމާލެވޭނެ ކަމަށް މިނިސްޓަރު ޑރ. އަބްދުﷲ މުއްތޮލިބު  ވަނީ މީގެ ކުރިން ވިދާޅުވެފައެވެ.

ޕްރީ-ކާސްޓް ސެގްމަންޓްތަކަކުން ބްރިޖްގެ އެއް ތަނބު އަނެއް ތަނބާ ގުޅުވާލާފައިވާއިރު، އޭގެ ފުރަތަމަ ސެގްމެންޓް ވިލިމާލެއާ ދިމާލުން ގުޅުވާލުމުގެ މަސައްކަތް މިހާރު ވަނީ ފަށާފަ އެވެ.

މިދިޔަ މަހު މިނިސްޓްރީން ހާމަކޮށްފައިވާ ގޮތުގައި ތަނބުތަކުގެ ޕައިލިންގެ 66 ޕަސެންޓް ވަނީ ނިމިފައެވެ. އަދި އޭގެ ތެރެއިން ޕައިލް ކެޕްގެ 46 ޕަސެންޓް މަސައްކަތާއި ޕިއާ ކޮލަމްގެ 48 ޕަސެންޓް ހިމެނޭ ކަމަށް މިނިސްޓްރީން ބުނެފައިވެއެވެ.

ފޮޓޯ: މިނިސްޓްރީ އޮފް އިންފްރާސްޓްރަކްޗާ

ކަނޑައަޅާފައިވާ ޝެޑިއުލާ އެއްގޮތަށް މަސައްކަތްތައް ކުރިއަށް ދާ ކަމުގައިވާނަމަ އަންނަ އަހަރު ފެބްރުއަރީ އަށް މާލެ އާއި ވިލިމާލެ ގުޅާލެވޭނެ ކަމަށާއި ލަފާކުރެވޭ ގޮތުގައި 2026 ވަނަ އަހަރުގެ ފަހުކޮޅުގައި މުޅި މަޝްރޫއު ނިންމާލެވޭނެ ކަމަށް މިނިސްޓްރީން ވަނީ ބުނެފައެވެ.