އެމެރިކާގެ ސްޓޭޓް ޑިޕާޓްމަންޓުން ރާއްޖެއަށް ނެރެފައިވާ ‘ޓްރެވަލް އެޑްވައިޒަރީ’ މި އަހަރު ވެސް ދަމަހައްޓަން ނިންމައިފި އެވެ.

އެމެރިކާ އިން ކޮންމެ އަހަރަކު ވެސް ރިވިއު ކުރާ ޓްރެވަލް އެޑްވައިޒަރީ ގައި 2023 ވަނަ އަހަރުގައި ކަނޑައަޅުއްވާފައިވާ ފަދައިން މިއަހަރުވެސް ރާއްޖެ ވަނީ ލެވެލް ދޭއްގައި ދަމަހައްޓައިފަ އެވެ. އެމެރިކާގެ ފަތުރުވެރިންނަށް ރާއްޖެ އަށް ދަތުރު ކުރުމުގައި ސަމާލުވުމަށް އެމެރިކާ އިން ވަނީ އަންގާފައެވެ.

އެމެރިކާއިން ނެރެފައިވާ ޓްރެވަލް އެޑްވައިޒަރީގައި ބުނެފައިވަނީ ޓެރަރިސްޓް ޖަމާއަތްތަކުން އިންޒާރަކާ ނުލައި ރާއްޖެއަށް ޓެރަރިސްޓް ހަމަލާއެއް ދީފާނެ ކަމުގެ ބިރު އެބައޮތް ކަމަށާއި އެ ހަމަލާތައް ޓޫރިޒަމް އާ ގުޅުން ހުރި ތަންތަނާއި މާރުކޭޓު ނުވަތަ ފިހާރަތަކަށް އަމާޒުކޮށްފާނެ ކަމަށެވެ.

Advertisement

މިޓްރެވަލް އެޑްވައިޒަރީގައި ރާއްޖެ ދަތުރުކުރުމުގައި އެމެރިކާގެ ރައްޔިތުން ސަމާލުވާން ޖެހޭ ކަންކަން ބަޔާންކޮށްފައިވާއިރު، އޭގެ ތެރޭގައި ރާއްޖޭގައި ހުންނަ އެމެރިކާ އެމްބަސީގެ ވެބްސައިޓް ކިޔުމާއި ގިނަ މީހުން އެއްވާ ތަންތަނަށް ނުދިއުމާއި ރާއްޖޭގެ މީޑިއާތައް ބެލުން ފަދަ ކަންކަން ހިމެނެ އެވެ.