ރައީސް ޔާމީން ވެރިކަމަށް ވަޑައިގަންނަވަން ދެއްކެވީ ރައީސް މައުމޫނުގެ ފޮޓޯފުޅު ދައްކައިގެން ކަަމަށް ޓޫރިޒަމް މިނިސްޓަރ އިބްރާހިމް ފައިސަލް ވިދާޅުވެއްޖެއެވެ.

ޕީއެންސީ އިން ބޭއްވި ހަރުގެ ޖަލްސާގައި ވާހަކަ ދައްކަވަމުން މިނިސްޓަރު މިހެން ވިދާޅުވީ ޕީއެންސީއިން ވެރިކަމަށް އައީ ރައީސް ޔާމީންގެ ހުސްގޮނޑި ދައްކައިގެން ކަމަށް ބުނެ ދެކެވޭ ވާހަކައަށް ރައްދު ދެއްވަމުންނެވެ.

ފައިސަލް ވިދާޅުވީ އޭރު އެބުނާ ހުސްގޮނޑި ދެއްކި ކަމަށްވަންޏާ ރައީސް ޔާމީން ވެރިކަމަށް ވަޑައިގަންނަވަން ދެއްކެވީ ރައީސް މައުމޫނުގެ ފޮޓޯ ކަމަށެވެ. އަދި ރައީސް މައުމޫނު ފޮޓޯ ދައްކައިގެން ވެރިކަމަށް ވަޑައިގެން އެމަނިކުފާނުގެ ތުއްދޮންބެ (ރައީސް މައުމޫނު) 7 މަސް ދުވަސް ވަންދެން ޖަލުގައި ބޭންދި ކަމަށެވެ.

Advertisement

މީގެ އިތުރުން ރައީސް ޔާމީން ގަބޫލު ކުރައްވަން ޖެހޭ ހަގީގަތަކީ ޕީޕީއެމް/ޕީއެންސީގެ ރިޔާސީ ޓިކެޓް ރައީސް މުއިއްޒު ހޯއްދެވީ ސިޔާސީ ގޮތުން މޮޅުވީމާ ކަމަށް ވެސް ވިދާޅުވިއެވެ. އަދި ރައީސް މުއިއްޒުއަށް ހަޖޫޖެހޭ ވަރުގެ ސިޔާސީ އެއްވެސް ބޭފުޅަކު ދިވެހިރާއްޖޭގެ ސިޔާސީ މައިދާނުގައި ނެތް ކަމަށް ވެސް މިނިސްޓަރ ވިދާޅުވިއެވެ.