ގްރޫޕް މާރާމާރީއަކާ ގުޅިގެން 5 މީހުން ހައްޔަރުކޮށްފިއެވެ.

ފުލުހުން ބުނީ މާލޭގައިި ހިނގި ގުރޫޕް މާރާމާރީ އަކާއި ގުޅިގެން ހައްޔަރުކޮށްފައިވަނީ 19 އަހަރުގެ މީހަކާއި 20 އަަހަރުގެ މީހަކާއި 23 އަަހަރުގެ މީހަކާއި 24 އަހަރުގެ ދެ މީހުން ކަމަށެވެ.

މި މީހުންގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރު ކުރުމުން، އޭގެ ތެރެއިން ދެ މީހަކު ތަހުގީގު ނިމެންދެން ބަންދުކުރުމަށް އަމުރުކޮށްފައިވާ ކަމަށާއި ދެން ތިބި 3 މީހުން ފަސް ދުވަހަށް ބަންދުގައި ބޭތިއްބުމަށް އަމުރުކޮށްފައިވާކަމަށް ފުލުހުން ބުނެއެވެ.

Advertisement

މި މީހުންނާ ދެކޮޅަށް، ފުލުހުން ކޯޓަށް ހުށަހަޅާފައިވަނީ ފުލުހުންގެ ބަޔާނާއި އިންޓަލިޖެންސް ރިޕޯޓާއި ހާދިސާ ރިޕޯޓުގައިވާ ތަފުސީލުތަކެވެ. އަދި ސީސީޓީވީ ފުޓޭޖާއި އެ ފުޓޭޖުގެ ސްނެޕްޝޮޓްތަކާއި އަނިޔާ ލިބުނު ފަރާތުގެ ފޮޓޯއެވެ.

ކްރިމިނަލް ކޯޓުން ނެރުނު އަމުރުގައިވާ ގޮތުން އެމީހުންގެ މައްޗަށް ކުރަނީ، ޖަމާއަތް ހަދައިގެން ތޫނު ހަތިޔާރާ ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގި ކަމުގެ ތުހުމަތެވެ. އަދި މި އެންމެން ބަންދުން ދޫކޮށްލައިފިނަމަ, މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ކޯޓު އަމުރުގައި ބުނެފައިވެއެވެ.