އިމިގްރޭޝަންގެ ވެހިކަލަކަށް ގެއްލުން ދިން ބިދޭސީއެއް ޑިޕޯޓު ކުރުމަށް ނިންމާފައިވާ ކަމަށް އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދު ރޭ ވިދާޅުވެއްޖެއެވެ.

ޝައްމާން ވިދާޅުވީ ނުގަވާއިދުން މާލޭގައި އުޅޭ ބިދޭސީން ހޯދުމަށްޓަކައި އިމިގްރޭޝަން އާއި ދިވެހިންގެ ފުލުހުންގެ ހިދުމަތް ގުޅިގެން ކުރިއަށް ގެންދިޔަ ޚާއްސަ ރެއިޑް އޮޕަރޭޝަނެއްގައި ބޮދޭސީއެއް ވެހިކަލަށް ގެއްލުން ދިނުމުންނެވެ.

މިމައްސަލަ އާއި ގުޅޭ ގޮތުން ޝައްމާން އެކްސްގައި ކުރި ޕޯސްޓެއްގައި ވިދާޅުވީ އެ ބިދޭސީ މީހާ މިހާރު އިމިގްރޭޝަންގެ ބެލުމުގެ ދަށުގައި ހުރި ކަމަށާއި އެމީހާއާ މެދު ވީ އެންމެ އަވަހަކަށް އިމިގްރޭޝަން ގާނޫނުން ހަރުކަށި ފިޔަވަޅު އެޅުމަށްފަހު ޑީޕޯޓް ކޮށްލެވޭނެ ކަމަށެވެ.

Advertisement

މީގެ އިތުރުން، ގަވާއިދާ ހިލާފަށް އުޅޭ ބިދޭސީން ހޯދުމަށް ހިންގާ މި އޮޕަރޭޝަން ފަސްޖެހުމެއް ނެތި އަދި ބިރަކަށް ސިހުމެއް ނެތި ކުރިއަށްދާނެ ކަމަށްވެސް ޝައްމާން ވިދާޅުވިއެވެ.

ރޭގައި ކުރިއަށް ދިޔަ އޮޕަރޭޝަނުގައި މާލޭގައި ޓޭކްއަވޭ/ކެފޭ ހިންގަމުންދާ ހަތަރު ތަނެއް ބަލައި ފާސްކުރުމަށްފަހު ހަތް ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. އަދި ހައްޔަރު ކުރި 7 މީހުންގެ ތެރެއިން ތިން މީހުން ހިނގާ ކެފޭއެއް ވެސް ވަނީ ބަންދުކޮށްފައެވެ.