ރާއްޖެއައި އިރު ލެޕްޓޮޕް ދަބަހުގައި ޑްރަގް ކަމަށް ޝައްކު ކުރެވޭ އެއްޗެއް ހުރުމުން، ބިދޭސީއަކު 15 ދުވަހަށް ބަންދު ކުރުމަށް ކްރިމިނަލް ކޯޓުން އަމުރުކޮށްފިއެވެ.

ކްރިމިނަލް ކޯޓުން ބަންދުކުރުމަށް އަމުރުކޮށްފައިވަނީ ބަންގަލަދޭޝްގެ ރައްޔިތެއް ރާއްޖެ އައިއިރު ގެނައި ލެޕްޓޮޕް ދަބަހެއްގައި އެއްޗެއް ފޮރުވާފައި ހުރިކަމަށް ތުހުމަތުކުރެވިގެން ކަސްޓަމްސް އޮފިސަރުން އޭނާގެ ހާޒިރުގައި އެ ދަބަސް ބަލައިފާސްކުރުމުން މަނާ ބޭސްކަމަށް ޝައްކު ކުރެވޭ ޓެބްލެޓްތަކެއް ފެނުމުންނެވެ.

އޭނާގެ ދަބަހުން ފެނުނު ޓެބްލެޓް ޓެސްޓް ކުރިއިރު މަސްތުވާތަކެތީގެ ބާވަތެއްކަމަށްވާ އެމްފެޓަމިންއަންއަށް ޕޮޒިޓިވް ޕޮޒިޓިވްވެފައިވާއިރު، އެތަކެތި ފެނުނު ސީންގައި އެއީ އޭނާ ބޭނުންކުރަން ގެންގުޅޭ އެއްޗެހި ކަމަށް އޭނާ ވަނީ ބުނެފައެވެ.

ލެޕްޓޮޕް ދަބަހުން ފެނުނު ތަކެތީގެ ބަރުދަނުގައި 690 ގްރާމް ހުރިކަމަށް އެ މައްސަލަ ތަހުގީގު ކުރި ފަރާތުން ވަނީ ބުނެފައެވެ.

މީގެ އިތުރުން، މިމައްސަލާގައި ހައްޔަރުކޮށްފައިވާ މީހާގެ ކުޑަކަމުދާ ތަކެތި ޓެސްޓު ކުރިއިރު އެމްފެޓަމިންއަން އަށް ޕޮޒިޓިވް ވެފައިވާ ކަމަށާއި ލެޕްޓޮޕް ދަބަހުން ފެނުނު ތަކެތީގެ ބަރުދަނުގައި 690 ގްރާމް ހުރިކަމަށް އެ މައްސަލަ ތަހުގީގު ފަރާތުން ވަނީ ބުނެފައެވެ.

މިމައްސަލާގައި ތުހުމަތު ކުރެވޭ ފަރާތުގެ ވަކީލު ބުނެފައިވަނީ ތުހުމަތު ކުރެވޭ ފަރާތަކީ ރާއްޖޭގައި 12 އަހަރު ވަންދެން މަސައްކަތް ކޮށްފައިވާ ގަވާއިދަށް އުޅޭ އެފަދަ އެއްވެސް ރެކޯޑެއް އޮންނަ ފަރާތެއް ނޫން ކަމަށެވެ.

ޑްރަގްސް ކަމަށް ބެލެވޭ އެއްޗެއްސާއި އެކު ހިފެހެއްޓި ބަންގްލަދޭޝް މީހާގެ އަތުން ފެނުނު ދަބަހަކީ ޑާކާ އެއާޕޯޓުން މުހައްމަދު ނަސީރު ކިޔާ ބަންގްލަދޭޝް މީހަކު ހަވާލުކުރި ދަބަހެއް ކަމަށާއި އެ ދަބަސް ބެލި އިރު އެއީ އެއްވެސް އެއްޗެއް ނެތް ހުސް ދަބަހެއް ކަމަށާއި ރާއްޖޭގެ އެއާޕޯޓުން ފުރަތަމަ ފަހަރު ޗެކް ކުރި އިރުވެސް އެއްވެސް އެއްޗެއް ފެނިފައިނުވާ ކަމަށް ތުހުމަތު ކުރެވޭ ފަރާތުގެ ވަކީލު ބުނެފައިވެއެވެ. އަދި ވަކީލު ބުނީ އެ ދަބަހުން ފޮރުވާފައިވާ އެއްޗެއް ފެނުނީ ދެވަނަ ޗެކިން އިން ކަމަށެވެ.

އެނާ އިތުރަށް ބުނެފައިވާ ގޮތުގައި ކުށުގެ ބާވަތަށް ބަލާއިރު ޖަދުވަލު 2 ގައި ހިމެނޭ ޑަކްޓަރު ޕްރިސްކްރިޕްޝަން އާއެކު ބޭނުންކުރެވޭ ބޭސްތަކެއް ފެނިފައިވާ ކަމަށާއި، މަނާބޭސް ތަކެއްކަން އެނގިހުރެ ރާއްޖެއަށް އެތަކެތި އެތެރެ ނުކުރާނެ ކަމަށެވެ. މީގެ އިތުރުން، އޭނާ އެދަބަހާއި ހަވާލުވީ ފުރަތަމަ ހަވާލުވިއިރު، ދަބަސް ޗެކްކުރުމަށްފަހު، އެއްވެސް އެއްޗެއް ނެތުމުން ކަމަށްވެސް ވަކީލު ބުނެފައިވެއެވެ.

ވަކީލު އިތުރަށް ބުނެފައިވާ ގޮތުގައި އޭނާގެ ކުޑަކަމުދާ އެއްޗެހި ޓެސްޓް ކުރުމުން އެމްފެޓަމިންއަންއަށް ޕޮޒިޓިވް ވެފައިވަނީ ބަނޑުގައި ރިއްސާތީ ޕެއިންކިލާއެއް ބޭނުންކުރުމުން ކަމަށެވެ.

އެހެންނަމަވެސް ބަޔާންކުރެވުނު ސަބަބުތަކަށް ބެލުމަށްފަހު ހުށަހެޅިފައިވާ ހެކިތަކަށް ރިއާޔަތްކޮށް މިމައްސަލަ ބެއްލެވި ގާޟީ އަލީ އާދަމް ނިންމެވީ މުޖުތަމައުގެ ސަލާމަތާއި ރައްކާތެރިކަމަށްޓަކައި 15 ދުވަހަށް އޭނާ ބަންދުކުރުމަށެވެ.