ގާނޫނުގައި ކަނޑައަޅާފައިވާ މުއްދަތުގެ ތެރޭގައި އޮޑިޓް ރިޕޯޓު ހުށަނާޅާ އޮތުމުގެ ސަބަބުން ތިން ސިޔާސީ ޕާޓީއެއް ބައިލައްކަ ރުފިޔާއިން ޖޫރިމަނާކޮށްފިއެވެ.

މިއަދު އިލެކްޝަންސް ކޮމިޝަނުން 'އެކްސް'ގައި ކުރި ޕޯސްޓެއްގައި ބަޔާންކޮށްފައިވާ ގޮތުގައި ގަނޫނުގައި ކަނޑައަޅާ ބަޔާންކޮށްފައިވާ ގޮތުގެ މަތީން ތިން ސިޔާސީ ޕާޓީއަކުން ނިމިދިޔަ އަހަރުގެ އޮޑިޓް ރިޕޯޓު ހުށަނާޅާ އޮތް ކަމަށެވެ.

އިލެކްޝަންސް ކޮމިޝަނުން ހާމަކޮށްފައިވާ ގޮތުގައި އެ ކޮމިޝަނުން ވަނީ މި ތިން ޕާޓީގެ ތެރެއިން ކޮންމެ ޕާޓީއެއް ވެސް ބައިލައްކަ ރުފިޔާއިން ޖޫރިމަނާކޮށްފައެވެ.

Advertisement

އެކްސްގައި ކުރި ޕޯސްޓެއްގައި އިލްކްޝަންސް ކޮމިޝަނުން ވަނީ މި ތިން ސިޔާސީ ޕާޓީ ހާމަކޮށްފައެވެ. އެއީ މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އާއި، މޯލްޑިވްސް ނެޝަނަލް ޕާޓީ (އެމްއެންޕީ) އަދި ދަ ޑިމޮކްރެޓްސް އެވެ.

ސިޔާސީ ޕާޓީތަކުގެ ގާނޫނުގެ 42 ވަނަ މާއްދާގައި ބަޔާންކޮށްފައިވާ ގޮތުން،

ކޮންމެ މީލާދީ އަހަރެއް ނިމޭތާ ތިން މަސް ދުވަހުގެ ތެރޭ ޕާޓީގެ އަހަރީ ހިސާބުތައް، އޮޑިޓާ ޖެނެރަލް ގަބޫލުކުރާ އޮޑިޓަރަކު މެދުވެރިކޮށް އޮޑިޓްކުރުމަށް ފަހު، އިލެކްޝަންސް ކޮމިޝަނަށާއި އޮޑިޓާ ޖެނެރަލަށް ހުށަހަޅަން ވާނޭ ކަމަށް ސިޔާސީ ޕާޓީތަކުގެ ގާނޫނުގެ 42 ވަނަ މާއްދާގައި ބަޔާންކޮށްފައިވެއެވެ.

މީގެއިތުރުން، ޕާޓީގެ އަހަރީ ހިސާބުތައް ބަލަހައްޓާފައި ނުވާ ނަމަ، ނުވަތަ ކޮމިޝަނަށް ހުށަހަޅަން ޖެހޭ މާލީ ރިޕޯޓުތައް ހުށަހަޅާފައިނުވާ ނަމަ، 20 ހާސް ރުފިޔާ އާއި 50 ހާސް ރުފިޔާ އާ ދެމެދުގެ އަދަދަކުން ޕާޓީތައް ޖޫރިމަނާކުރުމުގެ ބާރު އިލެކްޝަންސް ކޮމިޝަނަށް ލިބިގެންވާކަމަށް ހަމަ އެމިގާނޫނުގެ 44 ވަނަ މާއްދާގައި ބަޔާންކޮށްފައިވެއެވެ.