ފެނަކާ ކޯޕަރޭޝަނަށް ގެއްލުންވާގޮތަށް އަދި ކުންފުނީގެ މެންޑޭޓުގައި ނުހިމެނޭ ފެނަކާ އާއި ހަވާލުކޮށްފައިވާ ދެ ޕްރޮޖެކްޓެއް ބާތިލްކުރަން ނިންމާފައިވާކަމަށް ފެނަކާއިން ވިދާޅުވެއްޖެއެވެ.

ފެނަކާއިން ހާމަކޮށްފައިވާ ގޮތުގައި މިދިޔަ ފަސް އަހަރު ފެނަކާގެ މެނޭޖްމަންޓުން ނިންމާފައިވާ ބައެއް ނިންމުންތަކުގެ ސަބަބުން އެކުންފުނީގެ މާލީ ހާލަތުވަނީ މިއިން ދުވަހަކު ނުދާހާ ދަށަށް ގޮސްފައެވެ.

ފެނަކާއިން ބުނެފައިވާ ގޮތުގައި އޭގެ ސަބަބުން އެކުންފުނީގެ އެތައް މަޝްރޫޢެއް ސަރުކާރު ބަދަލުވިއިރު އޮތީ ހުއްޓިފައި ކަމަށާއި  4 ބިލިއަން ރުފިޔާއަށްވުރެ މަތީ އަދަދަކުން ކުންފުނި އޮތީ ދަރަނިވެރި ވެފައި ކަމަށެވެ.

ޕީއެންސީ ޖަލްސާއެއްގައި ވާހަކަ ދައްކަވަމުން ފެނަކައިގެ މެނޭޖިންގ ޑިރެކްޓަރ މުޢާޒް މުޙައްމަދު ރަޝީދު ވިދާޅުވީ ނިމިދިޔަ ސަރުކާރުގެ ދުވަސްވަރު ހަވާލުކުރި ބައެއް މަސައްކަތްތައް ރެކޯޑް ނުކުރެވިވާ ކަމަށާއި އެ ފައިސާ ނުދީގެން ގިނަ ބަޔަކު ކަންބޮޑުވުން ފާޅުކުރާ ކަމަށެވެ. ފެނަކައިން ހިންގި ޚިޔާނަތްތަކުގެ ތަފްޞީލު ރައްޔިތުންނަށް ފެންނަން އެބައޮތް ކަމަށާއި ނިމިދިޔަ ސަރުކާރުން އެ ކުންފުނި އިންތިހާއަށް ދަރިނިވެރިކޮށް، މީހުންގެ އިތުބާރު ގެއްލުވާލާފައިވާ ކަމަށް މުޢާޒް ވިދާޅުވިއެވެ.

މުއާޒް އިތުރަށް ވިދާޅުވީ ކުންފުންޏަށް ގެއްލުންވާ ގޮތަށް މެންޑޭޓުގައި ނުހިމެނޭ ބައެއް ޕްރޮޖެކްޓްތަކާ ފެނަކައިން ހަވާލުވެފައިވާ ކަމަށެވެ. އެގޮތުން ނިމިދިޔަ ސަރުކާރުން 48 އޭޓީއެމް އަޅަން ފެނަކަ ކޯޕަރޭޝަނާ ހަވާލުކުރި ކަމަށާއި، އެއިން ކޮންމެ ޕްރޮޖެކްޓެއް ފެނަކައާ ހަވާލުކޮށްފައިވަނީ 295،000 ރުފިޔާއަށް ކަމަށެވެ.

"އެވަރުގެ ތަނެއް ހަދަން އޭރުގެ މާކެޓް ރޭޓުން ދާނީ 8 ލައްކަ ރުފިޔާ، އެ ޕްރޮޖެކްޓްތަކަށް ދެން ނެގީ މުވައްޒަފުން. އެގްރީމަންޓްގައި ސޮއިވެސް ކުރި އެ ޕްރޮޖެކްޓްތަކަށް. ކޮންމެ ޕްރޮޖެކްޓަކަށް 4 ލައްކަ ނޫނީ 5 ރުފިޔާ ޚަރަދުކޮށްފި. 40 އިންސައްތަ މަސައްކަތް ނިމިފައި ހުރީ. ކިހާ ބޮޑު ގެއްލުމެއްތޯ މިއީ؟ އޭޓީއެމްތައް އަޅަމުންދިޔައީ ފެނަކައިގެ ބިންތަކުގައި" މުއާޒް ވިދާޅުވިއެވެ.

ހަމައެފަދައިން ނުއަގުގައި 9 އައިސްޕްލާންޓް އަޅަން ފެނަކާއާ ހަވާލުކޮށްފައިވާ ކަމަށާއި ޕްރޮޖެކްޓްގެ މަސައްކަތް ނުނިމެނީސް އޮޕަރޭޝަންއަށް މުވައްޒަފުން ނަގާފައިވާ ކަމަށް ވެސް އޭނާ ވިދާޅުވިއެވެ.

"އައިސް ޕްލާންޓް އަޅަން ފިޝަރީޒް މިނިސްޓްރީން ފެނަކައާ ހަވާލު ކުރި. އޭރު ހަވާލުކުރީ 9 އައިސް ޕްލާންޓް 4.5 މިލިއަން ރުފިޔާއަށް. އެ މަޝްރޫއު އަޅަން ހަވާލުކުރީ ވަރަށް ކުޑަ އަގެއްގައި. އެ އަދަދަށްވުރެން މާގިނައިން ފެނަކައިން ޚަރަދު ކޮށްފައިވޭ" މުއާޒް ވިދާޅުވިއެވެ.

މިހާރު އެ ދެ ޕްރޮޖެކްޓް ބާތިލުކޮށްދިނުމަށް މަސްވެރިކަމާއި ކަނޑުގެ ވަޞީލަތްތަކާއި ބެހޭ ވުޒާރާ އާއި ބޭންކް އޮފް މޯލްޑިވްސްގައި ދަންނަވާފައިވާނޭ ކަމަށާއި މިހާރު ފެނަކައިން އަންނަނީ ކުރިއަށް އޮތް ފަސް އަހަރު ފައިދާވާ ކުންފުންޏެއްގެ ގޮތުގައި އެކުންފުނި ހެދުމަށްޓަކައި ބިޒްނަސް ޕްލޭނެއް އެކުލަވާލަމުން ކަމަށް އޭނާ މުޢާޒް ވިދާޅުވިއެވެ.