އުތުރާއި މެދު ރާއްޖެ ތެރޭގެ އަތޮޅުތަކުގެ ބައެއް ރަށްތަކަށް މިރޭ ބޯކޮށް ވާރޭ ވެހޭނެ ކަމަށް މޫސުމާއި ބެހޭ ގައުމީ އިދާރާ (މެޓް)އިން އަންގައިފިއެވެ.

މޫސުމާއި ބެހޭ ގައުމީ އިދާރާއިން އަންގާފައިވާ ގޮތުގައި މިރޭ އުތުރާއި މެދު ރާއްޖެ ތެރޭގެ އަތޮޅުތަކުގެ ބައެއް ރަށްތަކަށް ވިއްސާރަ ކުރުމާއެކު ގުގުރާނެ ކަމަށް ލަފާ ކުރެވޭ ކަމަށާއި ބައެއް ރަށްތަކަށް ބޯކޮށް ވާރޭ ވެހުން އެކަށީގެންވާ ކަމަށެވެ.

މީގެ އިތުރުން، ދެކުނުގެ ބައެއް ރަށްތަކަށް ކެރީގެ އަސަރު ފޯރާ ގުގުރާނެ ކަމަށް ވެސް ލަފާކުރެވޭކަމަށް އެއިދާރާއިން ވިދާޅުވިއެވެ.

Advertisement

މެޓް އޮފީހުން ހާމަކޮށްފައިވާ ގޮތުގައި ހުޅަނގު ދެކުނާއި ހުޅަނގުން ގަޑިއަކު 10 މޭލާއި 18 މޭލާ ދެމެދުގެ ބާރުމިނުގައި ވައިޖެހޭ ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައި ގަދަވުން އެކަށީގެންވާ ކަމަށެވެ.

ދެކުނުގެ ކަނޑުތައް އާދައިގެ ވަރަކަށް މަޑުވާނެ ކަމަށާއި އުތުރާއި މެދު ރާއްޖެ ތެރޭގެ ކަނޑުތައް އާދައިގެ ވަރަށް ގަދަވެފައި ވިލާގަނޑު ގަދަވާނެ ކަމަށްވެސް އެއިދާރާއިން ވިދާޅުވެފައި ވެއެވެ.