ކޮރަޕްޝަން ހުއްޓުވުމުމަށްޓަކައި މުޅި ދައުލަތުގެ ވިސްނުން އެއްގޮތްވާންޖެހޭ ކަމަށް އެންޓިކޮރަޕްޝަން ކޮމިޝަން (އޭސީސީ)ގެ ރައީސް އާދަމް ޝާމިލް ވިދާޅުވެއްޖެއެވެ.އޭސީސީގެ ރައީސް ޝާމިލް މިހެން ވިދާޅުވީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް އަށް މިއަދު ހާޒިރުވެ ވާހަކަ ދައްކަވަމުންނެވެ. މިއަދުގެ ބައްދަލުވުމުގައި ވާހަކަ ދައްކަވަމުން ޝާމިލް ވިދާޅުވީ އެއް ކޭސް ގައި އޭސީސީން އަންގާ އެންގުމަކީ އެއަށް އަމަލުކުރަން ނުޖެހޭނެ އެއްޗެއް ކަމަށް ދައުލަތުން ވިދާޅުވާއިރު އަނެއް ކޭސްގައި ވަރަށް އަވަހަށް އޭސީސީން އެންގުންތައް އަންގަން ޖެހޭނެ ކަމަށް ގަބޫލު ކުރަން ޖެހޭނެ ކަމަށް ދެކުމަކީ ދެ ވިސްނުމެއް ކަމަށާއި ކޮރަޕްޝަން ނައްތާލުމުގައި އެންމެ މުހިންމު ކަމަކީ ދައުލަތުގެ މުޅި ނިޒާމު އެއް ވިސްނުމެއް ގެންގުޅުން ކަމަށެވެ.

"ޕްރޮމޯޝަން އެއް ދޭން ރާވަމުން ދަނިކޮށް އޭސީސީ އަށް އެކަން އެނގިގެން ޕްރޮމޯޝަން މަޑުޖައްސާލުމަށް ބުނީމަ ދައުލަތުން އެ ޕްރޮމޯޝަނަކީ އޭސީސީ އަށް މަޑުޖައްސާލަން ނޭންގޭނެ ކަމެއް ކަމަށް ބުނާއިރު އަނެއް ކޮޅުން އޭސީސީގެ މަސައްކަތް އަވަސް ކުރުމަށް އަވަށް ފިޔަވަޅު އަޅަން ޖެހޭނެ ކަމަށް ބުނީމަ އެއީ ދެވިސްނުމެއް،" ޝާމިލް ވިދާޅުވިއެވެ.

މިދަޔަ އަހަރުގެ އޮކްޓޫބަރު މަހުގައި އޭސީސީއިން ވަނީ ފުލުހުންނަށް ޕްރޮމޯޝަން ދިނުން މަޑުޖެއްސުމަށް އަންގާފައިވަނިކޮށް ފުލުހުންގެ ހިދުމަތުން ވަނީ އޭސީސީގެ އެންގުމާއި ޚިލާފަށް އަމަލުކޮށްފައެވެ. މިމައްސަލާއާއި ގުޅިގެން އޭސީސީއިން ފުލުހުންނާއި ދެކޮޅަށް ސިވިލް ކޯޓުގައި މައްސަލަ ޖައްސާފައެވެ.

Advertisement

އޭސީސީއިން ސިވިލް ކޯޓުގައި ފުލުހުންނާއި ދެކޮޅަށް ކުރި ދައުވާގައި ސިވިލް ކޯޓުން ޙުކުމް ކޮށްފައިވަނީ އޭސީސީ އާއި ދެކޮޅަށެވެ. އަދި އޭސީސީ އިން ސިވިލް ކޯޓުގެ ޙުކުމް ހައިކޯޓުގައި އިސްތިޢުނާފު ކުރުމުން ދައުލަތުން ބުނެފައިވަނީ ވަކި ކަމެއް ނުކުރަން ނުވަތަ މަޑުޖައްސާލަން އެންގުމުގެ ބާރު ގާނޫނުގެ ދަށުން އޭސީސީއަށް ލިބިގެން ނުވާ ކަމަށެވެ.

މިއަދު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި މަޝްވާރަ ކުރެވުނު ކަންކަމާއި ގުޅިގެން އޭސީސީއިން ނެރެފައިވާ ނޫސްބަޔާންގައި ބުނެފައިވަނީ މިއަދުގެ ކޮމިޓީގައި އޭސީސީގެ ފަރާތުން ދައްކާފައިވާ ވާހަކަ ތަކަކީ އޭޖީ އަށް އަދި އެހެން މުއައްސަސާ އަކަށްވެސް ރައްދު ދިނުމުގެ ގޮތުން ދައްކާފައި ހުރި ވާހަކަ ތަކެއް ނޫން ކަމަށެވެ.