ކުރީ ސަރުކާރުގައި ފެނަކަ ކޯޕަރޭޝުން ބައެއް މަޝްރޫޢުތައް އެ ކޯޕަރޭޝަންގެ އިސްވެރިން ބޭނުންވި ބަޔަކަށް މަންފާވާ ގޮތަށް ހިންގާފައިވާ ކަމަށް އެންޓި ކޮރަޕްޝަން ކޮމިޝަންގެ ރައީސް އާދަމް ޝާމިލް ވިދާޅުވެއްޖެއެވެ.

ރައްޔިތުންގެ މަޖިލީހުގެ ނިވަން މުއައްސަސާތަކުގެ ކޮމިޓީގައި ވާހަކަ ދައްކަވަމުން ޝާމިލް ވިދާޅުވީ، ކުރީ ސަރުކާރުގައި ފެނަކަ ކޯޕަރޭޝުން 60 މަޝްރޫޢު ހިންގާފައިވަނީ ވަކި ބަޔަކަށް މަންފާވާ ގޮތަށް ކަމަށާއި އެކޯޕަރޭޝަނުން ކޮރަޕްޝަނަށް ތުހުމަތުވާފަދަ އެތައް މަޝްރޫޢުއެއް ހިންގާފައިވާކަމަށެވެ.

ފެނަކަ ކޯޕަރޭޝަންގެ މިހާރުގެ މެނޭޖިން ޑިރެކްޓަރ މުޢާޒް މުޙައްމަދު ރަޝީދު ވެސް ވަނީ މިދިޔަ ސަރުކާރުން ސީދާ ފެނަކަ ކޯޕަރޭޝަނަށް ގެއްލުންވާ ގޮތަށް އެތައް ކަމެއް ކޮށްފައިވާ ކަމަށާއި ކުރީގެ މެނޭޖްމެންޓުން އަމިއްލަ 60 މަޝްރޫއެއް ހިންގާފައިވާފައިވާ ކަން ހާމަ ކުރައްވާފައެވެ.

އެގޮތުން މީގެ ތެރެއިން 25 މަޝްރޫޢެއްގެ މަސައްކަތްކޮށްފައިވަނީ ކުންފުންޏަށް އިންތިހާއަށް ގެއްލުންވާގޮތަށް ބީއޯކިއުއެއް އަދި މާކެޓުގައި މި މަސައްކަތްތައް ކުރެވޭނެ އަގަށް ބެލުމެއްނެތިކަމަށް ވެސް މުޢާޒް ވަނީ ވިދާޅުވެފައިވެއެވެ.

މުއާޒް ވިދޅުވީ މިފަދައިން އަމަލުކުރުމުން އެތައް ސަޕްލަޔަރުންނަށް ދޭން ޖެހޭ ފައިސާ ނުދެވި ކުންފުނި އެތައް ގުނައަކުން ދަރާފައިވާ ކަމަށެވެ.

މިއަދުގެ ބައްދަލުވުމުގައި ވާހަކަ ދައްކަވަމުން ޝާމިލް ވިދާޅުވީ ފެނަކައިގެ ކުރީގެ މެނޭޖްމަންޓުން އަމިއްލައަށް ހިންގާފައިވާ 60 މަޝްރޫޢުއެއްގެ ތަފްސީލް ދެނެގަތުމުގެ މަސައްކަތް އޭސީސީން މިހާރު ކުރަމުންދާ ކަމަށާއި މިހާރުވެސް މި މައްސަލަތަކުގައި ކޮރަޕްޝަނަށް ތުހުމަތުވާ ކަންކަން ފާހަގަކުރެވިފައިވާކަމަށެވެ. މީގެ އިތުރުން، އެންމެ ބޮޑަށް ފާހަގަކުރެވިފައިވަނީ ނުޙައްޤުން މުއްސަނދިކަން ހޯދާފައިވާ މައްސަލަތައް ކަމަށް ޝާމިލް ވިދާޅުވިއެވެ.

ޝާމިލް ވިދާޅުވީ މި މައްސަލަތަކުގައި ހިމެނޭ މީހުން ނުޙައްޤުން މުއްސަނދިކަން ހޯދާފައިވާ ގޮތް ބެލުމަށް އެމީހުންގެ މާލީ ޙާލަތާއި، ބޭންކު ޓްރާންސެކްޝަންތަކުގެ ދިރާސާހެދުމުގެ މަސައްކަތް މިހާރު ކުރަމުންދާކަމަށެވެ. އަދި މިހާތަނަށް ކޮށްފައިވާ ތަހުގީގު ތެރެއިން ވަކި ދުވަސްވަރެއްގެ ތެރޭގައި ވަކި ބަޔަކަށް ފައިދާވާ ގޮތަށް ވަޒީފާތަކެއް ދީގެން މަޝްރޫޢުތަކެއް ހިންގާފައި ހުރިކަން ފެންނަން އެބަ އޮތް ކަމަށެވެ.

ވޭތުވެ ދިޔަ އަހަރުތަކުގައި ފެނަކަ ކޯޕަރޭޝަނުން ދައުލަތަށް ވަރަށް ބައިވަރު ފައިސާ ގެއްލުވާލާފައިވާ ކަން ފާހަގަކުރައްވަމުން ޝާމިލް ވިދާޅުވީ މީގެ ތެރެއިން ދައުލަތަށް އަނބުރާ ހޯދިފައިވަނީ ވަރަށް ކުޑަ މިންވަރެއް ކަމަށެވެ. އެގޮތުން ދައުލަތަށް ގެއްލިފައިވާ ފައިސާއިން 91،332 ރުފިޔާ 38 ލާރި ހޯދާފައިވާ ކަމަށް ޝާމިލް ވިދާޅުވެފައިވާއިރު، ފެނަކަ ކޯޕަރޭޝަނުން ދައުލަތަށް ގެއްލިފައިވާ ޖުމްލަ ފައިސާގެ އަދަދު ހާމަކޮށްފައެއް ނުވެއެވެ.

"ފެނެކައިގެ ތަޙުޤީޤު މިހާރު ބައްޓަންކޮށްފައިވަނީ މަޤާމު ބޭނުންކޮށްގެން މަންފާ ލިބުމާއި ހޯދައިދިނުމާއި ޚިޔާނާތާއި ރިޝްވަތު ލިބިގަނެފައިވޭތޯ ބެލުމާއި ނުޙައްޤުން މުއްސަނދިކަން ހޯދުން، މި 5 ކުށަށް." ޝާމިލް ވިދާޅުވިއެވެ.