އައްޑޫ ސިޓީގައި ޕޮލިސް ކޮލެޖުން ތަމްރީން ހޯދަމުންދާ ފަސް ދަރިވަރަކަށް އައްޑޫ އިކުއެޓޯރިއަލް ހޮސްޕިޓަލްގެ އައިސީޔޫގައި ފަރުވާދެމުން އަންނަ ކަމަށް ފުލުހުން ބުނެފިއެވެ.

ފުލުހުން ބުނެފައިވާ ގޮތުގައި ކާނާ ވިހަވި ކަމަށް ބެލެވޭ މައްސަލައެއްގައި އެ ކޮލެޖްގެ 32 ދަރިވަރަކު އައްޑޫ އިކުއެޓޯރިއަލް ހޮސްޕިޓަލަށް ގެންދެވުނު ކަމަށާއި އެތަނުން ފަސް ދަރިވަރެއްގެ ހާލު ސީރިއަސް ވުމުގެ ސަބަބުން އެހޮސްޕިޓަލުގެ އައިސީޔޫގައި ފަރުވާދެމުން ގެންދާ ކަމަށެވެ.

އައްޑޫ ހޮސްޕިޓަލްގެ އޮފިޝަލަކާއި ހަވާލާދީ ރާއްޖޭގެ އޮންލައިން ނޫހެއް ކަމަށް ސަން އޮންލައިން އިން ރިޕޯޓްކޮށްފައިވާ ގޮތުފައި އެ ދަރިވަރުން ހޮސްޕިޓަލަށް ގެންދިޔައީ މިރޭ އަށެއް ޖަހައިކަން ހާއިރު ކަމަށާއި އެ އެންމެންނަށް ވެސް ފުރަތަމަ ފަރުވާ ދިނީ އެމާޖެންސީގައި ކަމަށެވެ. އަދި މިހާރެ އެ ދަރިވަރުން ދަނީ ވޯޑަށް ބަދަލު ކުރަމުން ކަމަށް އޭނާ މައުލޫމާތު ދީފައިވާ ކަމަށް ސަން އިން ރިޕޯޓްކޮށްފައިވެއެވެ.

Advertisement

ފުލުހުން މައުލޫމާތު ދީފައިވާ ގޮތުގައި ކޮލެޖްގައި ކިޔެވި ދަރިވަރުން ބަލިވިކަމަށް ބޮޑަށް ބެލެވެނީ ކާނާ ވިހަވެގެންނެވެ. އަދި މިހާރު ފަރުވާ ދިނުމަށްފަހު ބައެއް ދަރިވަރުން ކޮލެޖަށް އަންބުރާ ގެންދާ ކަމަށް ވެސް ފުލުހުން ބުނެފައިވެއެވެ.

މިމައްސަލަ ދިމާވި ގޮތް ހޮސްޕިޓަލް މެދުވެރިކޮށް ބަލަމުން އަންނަ ކަމަށް ފުލުހުން ބުނެފައިވެއެވެ.

އައްޑޫ ސިޓީގައި ހިންގަމުންދާ އައްޑޫ ޕޮލިސް ކޮލެޖް އަކީ އިންޑިއާގެ ހިލޭ އެހީގެ ދަށުން އައްޑޫގައި ގާއިމްކުރެވިފައިވާ ކޮލެޖެކެވެ. މިކޮލެޖް ރަސްމީކޮށް ހުޅުވުނީ މާޗު 27، 2022ގައެވެ.