ފުލުހުން ހައްޔަރުކުރަން އުޅެނިކޮށް އަނިޔާވެގެން ހޮސްޕިޓަލުގައި ފަރުވާދެމުންދާ އުމުރުން 38 އަހަރުގެ މުހައްމަދު އަޒްމީލް ޖަލީލަށް އަނިޔާވީ ކުޑަދޮރުން ވެއްޓި ކަމަށާއި، އޭނާ ހޮސްޕިޓަލަށް ގެންދިޔައީ ކަސްޓޯޑިއަލްއަށް ގެންދިއުމަށްފަހު ކަމަށް ފުލުހުން ބުނެފިއެވެ.

މިދިޔަ ހޯމަ ދުވަހު ފުލުހުން ހައްޔަރުކުރަން އުޅުމުގެ ތެރޭގައި އަޒްމީލްއަށް އަނިޔާވެގެން އައިޖީއެމްއެޗް ހޮސްޕިޓަލުގެ އައިސީޔޫގައި ދަނީ ފަރުވާދެމުންނެވެ.

ފުލުހުން ބުނެފައިވާ ގޮތުގައި މި ހާދިސާގައި އޭނާގެ ބޯ ފަޅައިގެން ގޮސް އޭނާއަށް ވަނީ އިތުރު އަނިޔާތަކެއް ލިބިފައެވެ. މީގެ އިތުރުން، އަޒްމީލު ހައްޔަރުކޮށްގެން ފުރަތަމަ ގެންދިޔައީ މާލޭ ކަސްޓޯޑިއަލަށް ކަމަށާއި، އައި.ޖީ.އެމް.އެޗް އަށް ގެންދިޔައީ ފުލުހުންގެ މެޑިކަލް އޮފިސަރު ބެލުމަށްފަހު ކަމަށް ވެސް ފުލުހުން ބުނެފައިވެއެވެ.

Advertisement

އަޒްމީލު ހައްޔަރުކުރުމުގައި ފުލުހުން އަމަލުކުރި ގޮތާއި ގުޅިގެން އަޒްމީލް އާއިލާއިން ވަނީ ކަންބޮޑުވުން ފާޅުކޮށްފައެވެ. ފުލުހުން ވަނީ މި ހާދިސާ ހިނގި ގޮތް ބަލައިދިނުމަށް ފުލުހުންގެ ޕްރޮފެޝަނަލް ސްޓެންޑާޑްސް ކޮމާންޑާއި ނެޝަނަލް އިންޓެގްރިޓީ ކޮމިޝަންގެ އިތުރުން ހިއުމަން ރައިޓްސް ކޮމިޝަންގައި އެދިފައެވެ.