ގަވާއިދާ ހިލާފަށް އުޅޭ ބިދޭސީން ހޯދަން މިސަރުކާރުން ކުރަމުންދާ މަސައްކަތް ފުޅާ ކުރުމަށް "އިމިގްރޭޝަން ވޮޗް"ގެ ނަމުގައި ހާއްސަ ޕްލެޓްފޯމެއް ތަޢާރަފް ކޮށްފިއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި މި ހިދުމަތް ތައާރަފްކޮށްދެއްވީ އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދެވެ.

އިމިގްރޭޝަނުން ހާމަކޮށްފައިވާ ގޮތުގައި މިޕްލެޓްފޯމް މެދުވެރިކޮށް މައުލޫމާތު ދޭ ފަރާތް ނޭނގޭ ގޮތަށްވެސް ގަވާއިދާއި ޚިލާފަށް އުޅޭ ބިދޭސީން ރިޕޯޓް ކުރެވޭނެ ކަމަށާއި އެގޮތަށް ހުށަހަޅާ ރިޕޯޓްގައިވާ މައުލޫމާތުގެ ސިއްރު ހިފެހެއްޓޭނެ ކަމަށެވެ.

Advertisement

ފޮޓޯ: މޯލްޑިވްސް އިިމިގްރޭޝަން

އިމިގްރޭޝަނުން ނުގަވާއިދުން އުޅޭ ބިދޭސީން ހޯދުމަށް ކުރާ މަސައްކަތްތަކަށް ދިވެހި ރައްޔިތުންގެ ފަރާތުން ބޮޑު ތަރުހީބެއް ލިބޭކަން ފާހަގަކުރައްވަމުން އިމިގްރޭޝަން ކޮންޓްރޯލާ މުހައްމަދު ޝައްމާން ވަހީދު ވިދާޅުވީ މި ޕްލެޓްފޯމް މެދުވެރިކޮށް ފަސޭހަ ކަމާއެކު އިމިގްރޭޝަނާއި ގުޅުން ހުރި މައްސަލަތައް ރިޕޯޓް ކުރެވޭނެ ކަމަށެވެ.

ޝައްމާން އިތުރަށް ވިދާޅުވީ މި ޕްލެޓްފޯމް މެދުވެރިކޮށް ގަވާއިދާއި ހިލާފަށް އުޅޭ ބިދޭސީންގެ މައްސަލަ ރިޕޯޓް ކުރެވިދާނެ ކަމަށާއި، އަދި ރާއްޖެއަށް ގަވާއިދާ ހިލާފަށް އެތެރެވާން އުޅޭ ބިދޭސީންގެ މައުލޫމާތު ހިއްސާ ކުރެވިދާނެ ކަމަށެވެ.

"މި ޕްލެޓްފޯމް ބޭނުންކޮށްގެން ކޮންމެހެން ނުޖެހޭ ތިބޭފުޅުންގެ އަަމިއްލަަ އައިޑެންޓިޓީ ފާހަގަކުރާކަށް، އައިޑެންޓިޓީ ފާހަގަ ނުކޮށްވެސް އެނޮނިމަސްކޮށްވެސް ތިބޭފުޅުންނަށް ރިޕޯޓް ކުރުމުގެ ފުރުސަތު އެބަ އޮތް މިހާރު،". އޭނާ ވިދާޅުވިއެވެ.

މި ޕްލެޓްފޯމް މެދުވެރިކޮށް 24 ގަޑިއިރު މައުލޫމާތު ހުށަހެޅޭއިރު، މިކަމުގެ ސަބަބުން އާއްމުންނާއި ގުޅިގެން ކުރެވޭނެ ވަރަށް ގިނަ މަސައްކަތްތައް އެބަ ހުރި ކަމަށާއި، އެ އިދާރާއަށް ބޭނުންވާ ނުލިބި ހުރި މައުލޫމާތުތައްވެސް ފަސޭހަކަމާއެކު އާއްމުންނަށް ހިއްސާ ކުރެވޭނެ ކަމަށް ޝައްމާން ވިދާޅުވިއެވެ.