އާބާދީގައި 3،000 އަށް ވުރެ މަދު ރަށްރަށަށް 3 ކައުންސިލަރުން ފުދޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ހޯމް މިނިސްޓްރީގެ ނާރެސް ޕޯޓަލް އާއި ކުރަނގި އޮޕަރޭޝަންގެ ދެ ވަނަ ފޭސް އިފުތިތާހުކުރުމަށް ދަރުބާރުގޭގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.

ރޭގެ ރަސްމިއްޔާތުގައި ރައީސް ވިދާޅުވީ ކައުންސިލުތަކުން ދޭ ހިދުމަތްތަކުގެ ފެންވަރު ރަނގަޅު ކުރުމަށްޓަކައި ގިނަ ބަދަލުތަކެއް ގެންނަން ޖެހޭ ކަމަށާއި އެ ބަދަލުތައް ގެނައުމަށްޓަކައި ކަމާ ބެހޭ އިދާރާތަކުން މަސައްކަތްކުރަމުން އަންނަ ކަމަށެވެ.

އެގޮތުން ކައުންސިލުތަކުގައި ތިބޭ ކައުންސިލަރުންގެ އަދަދު މަދުކުރަންޖެހޭކަން ފާހަގަކުރައްވާ ރައީސް ވިދާޅުވީ އަބާދީގައި 3،000 މީހުންނަށް ވުރެ ގިނަ ނޫން ރަށްތަކަށް ތިން ކައުންސިލަރުން އިންތިހާބު ކުރީމަ ފުދޭނެ ކަމަށެވެ.

"އަޅުގަނޑު ހިތުން 3،000 މީހުންނަށް ވުރެ ގިނަ ނޫން އާބާދީ އޮންނަ ރަށުގައި ތިން ބޭފުޅަކު އިންތިހާބުކުރީމަ ފުދޭނެ،" ރައީސް ވިދާޅުވި އެވެ.

"ކައުންސިލުގެ ރައީސަކާއި އަދި އިތުރު ދެ ބޭފުޅުން. އޭގެ ތެރެއިން އެއް ބޭފުޅަކީ އަންހެނުންގެ ފަރާތުން އިންތިހާބުކުރާ އަންހެނުންގެ ރައީސާއަކަށް ވުމާއި އަދި އެއް ބޭފުޅަކީ ޒުވާނުންގެ ފަރާތުން އިންތިހާބުކުރެވޭ ޒުވާނުންގެ ރައީސެއްގެ ގޮތުގައި ހުންނަ ބޭފުޅަކަށް ވެ، ތިން ބޭފުޅުން ތިބެ ކައުންސިލްގެ ރައީސްގެ ގޮތުގައި ހޮވާ މީހާގެ އިތުރަށް ދެން ހޮވާ ދެ ބޭފުޅުންގެ ތެރެއިން އެކަކު އެއީ ނައިބު ރައީސަކަށް ކަނޑައެޅިދާނެ." ރޭގެ ރަސްމިއްޔާތުގައި ރައީސް ވިދާޅުވިއެވެ.

ރައީސް ވިދާޅުވީ މިފަދައިން މިއުސޫލަށް ބަދަލު ގެނެވިއްޖެ ކަމުގައިވާނަމަ، ކައުންސިލްތަކާއި އަންހެނުންނާއި ޒުވާނުންގެ ބައިވެރިވުން ވެސް އޮންނާނެ ކަމަށެވެ.

މީގެއިތުރުން މިއުސޫލުގެ ދަށުން މާލޭގައި ވެސް ކޮންމެ 3،000 މީހަކަށް ކައުންސިލަރެއް ހުރުން ރަނގަޅު ވާނެ ކަމަށާއި 3،000 އާއި 10،000 ދެމެދުގެ އާބާދީއެއް އޮންނަ ރަށްރަށުގައި ފަސް ކައުންސިލަރުން ތިބުމުން ފުދޭނެ ކަމަށް ރައީސް ވިދާޅުވިއެވެ.

"އޭރަށް [ކައުސިލްތަކަށް] ލިބޭ ބަޖެޓުގެ ބޮޑު ބައެއް ކައުންސިލްގައި މަސައްކަތްކުރާ ސިވިލް ސާވަންޓުންނަށް ރަނގަޅު މުސާރައެއް ދެވޭ ގޮތަށް މިހާރަށް ވުރެ ވެސް ގިންތި ރަނގަޅު ކޮށްފައި ރަނގަޅު މުސާރައެއް ދެވޭ ގޮތަށް ބައްޓަން ކޮށްގެން ހިންގީމާ އަޅުގަނޑު ހިތުން ކައުންސިލްގެ ހުރިހާ މުވައްޒަފުން ވެސް އުފާވެރިކަމާ އެކީގައި ރަނގަޅު ހިދުމަތެއް ދެވޭނީ،" ރައީސް ވިދާޅުވި އެވެ.

އެހެންނަމަވެސް މިފަދައިން މިއުސޫލަށް ބަދަލު ގެންނާނީ މިކަމާއި ގުޅޭ ފަންނީ ދިރާސާ ކުރުމަށްފަހު ކަމަށްވެސް ރައީސް ވިދާޅުވިއެވެ.

"އަދަދު ކުޑަކޮށްގެން އެ ދޭ ހިދުމަތް އަދި ރަނގަޅަށް ވެސް ދެވޭނެ،" ރައީސް ވިދާޅުވި އެވެ.

ސަރުކާރުން ދަނީ ދައުލަތުގެ ހަރަދު ކުޑަކުރުމަށް ގިނަ ފިޔަވަޅުތަކެއް އަޅަމުންނެވެ. އެގޮތުން ރަށު ކައުންސިލަރުންގެ އަދަދު މަދުކޮށް އަދި އަތޮޅު ކައުންސިލް އެކުލެވޭ ގޮތަށް ބަދަލުތަކެއް ގެންނަވާނެ ކަމަށް އިއުލާން ކުރައްވާ މިފަދައިން މިބަދަލު ގެނެވިއްޖެ ކަމުގައިވާނަމަ، ދައުލަތުގެ ހަރަދުން ބޮޑު ބައެއް ސަލާމަތް ކުރެވޭނެ ކަމަށް ރައީސް ވަނީ މީގެ ކުރިން ވިދާޅުވެފައެވެ. އަދި އެފައިސާއިން ރައްޔިތުންނަށް ތަރައްގީ ގެނައުމަށް ގިނަ މަސައްކަތެއް ކުރެވޭނެ ކަން ވެސް އެ ރައީސް ވިދާޅުވިއެވެ.

މިރޭގެ ރަސްމިއްޔާތުގައި ރައީސް އިތުރަށް ވިދާޅުވީ ކައުންސިލްތައް ބާރުވެރިކުރުވުމަށްޓަކައި މިސަރުކާރުން ވަރަށް ގިނަ ކަންކަން ކުރަން ރާވާފައިވާ ކަމަށާއި، ޓޫރިޒަމްގެ ދާއިރާއިން ރާއްޖެއަށް ލިބޭ އާމްދަނީ އިން ވަކި ޕަސެންޓެއް ކައުންސިލްތަކުގެ ބަޖެޓަށް ޖަމާކުރަން އެ މަނިކުފާނުގެ ވައުދާ އެއްގޮތަށް ނިންމެވި ނިންމެވުން ލަސްތަކެއް ނުވެ ތަންފީޒުކުރަން ފަށާނެ ކަމަށެވެ.