ފަލަސްތީނުގެ ބިންތަކަށް އިޒްރޭލުން ވެރިވެގަނެފައިވަނީ ގާނޫނާއި ޚިލާފަށް ކަމަށާއި ވީއެންމެ އަވަހަކަށް ފަލަސްތީނުގެ ބިންތަކުން ޔަހޫދީން ނެރެންޖެހޭ ކަމަށް ބުނެ އިންޓަނޭޝަނަލް ކޯޓް އޮފް ޖަސްޓިސް އިން އިސްތިޝާރީ ލަފައެއް ނެރެފިއެވެ.

އިއްޔެ ދަ ހޭގްގައި ހުންނަ އދ. ގެ އެންމެ މަތީ ކޯޓު، އިންޓަނޭޝަނަލް ކޯޓް އޮފް ޖަސްޓިސް އިން ބުނެފައިވަނީ މީގެ އެތައް އަހަރެއް ކުރިން ފެށިގެން ފަލަސްތީނުގެ ބިންތަކަށް ވެރިވެގަންނަމުން ދިއުމަކީ ގާނޫނާއި ޚިލާފު އަމަލެއްކަމަށެވެ. އަދި އެހެންކަމުން މިކަމަށް ވީއެންމެ އަވަހަކަށް ނިމުމެއް ގެނެސް ފަލަސްތީނުގެ ބިންތަކުން ޔަހޫދީން ނެރެންޖެހޭ ކަމަށެވެ.

އައިސީޖޭ އިން މިފަދައިން ނިންމުމުން ފަލަސްތީނުގެ ސަރުކާރުން މިއީ ތާރީޚީ ނިންމުމެއް ކަމުގައި ބުނެފައިވާއިރު އިޒްރޭލުން މިނިންމުމާއި ދެކޮޅު ހަދާ މިއީ ހުސް ދޮގުގެ މައްޗަށް ބިނާކޮށް ނިންމާފައިވާ ނިންމުމެއްކަމަށް ބުނެފައިވެއެވެ.

އެގޮތުން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ބުނެފައިވަނީ އައިސީޖޭގެ ނިންމުމުގައި ހުރީ ދޮގު ކަމަށެވެ.

"ޔަހޫދީންނަކީ އެ މީހުންގެ އަމިއްލަ ބިމުގައި ތިބޭ ބައެއް. އެއީ ހިސާރުކޮށް އަޅުވެތިކުރާ ބައެއް ނޫން،" ނަތަންޔާހޫ ބުންޏެވެ.

ފަލަސްތީނުގެ ބިންތަކުން ޔަހޫދީން ވަޒަންވެރިވެފައިވަނީ ގާނޫނާއި ޚިލާފަށްކަމަށް ކަނޑައަޅާ އައިސީޖޭއިން ނިންމާފައިވާ ނިންމުމަކީ އައިސީޖޭއިން ނެރެފައިވާ "އެޑްވައިޒަރީ އޮޕީނިއަން އެއް" އެނިންމުމުގެ މައްޗަށް އަމަލުކުރުން އިޒްރޭލުގެ މައްޗަށް ލާޒިމެއް ނުވާނެއެވެ.

އެހެންނަމަވެސް މިނިންމުމުގެ ސަބަބުން، އިޒްރޭލާއި ދެކޮޅަށް ބަލަމުންދާ މައްސަލަތަކަށް ބުރަދަން ލިބިގެންދާނެ ކަމަށް ބެލެވެއެވެ.

ފަލަސްތީނުގެ ބިންތަކުގައި އިޒްރޭލު ދެމިއޮތުމަކީ ޣައިރު ގާނޫނީ އަމަލެއް ކަމަށް ކޯޓުން ކަނޑައަޅާފައިވާ ކަމަށް އައިސީޖޭގެ ރިޔާސަތު ބަލަހައްޓަވާ ފަނޑިޔާރު ނަވާފް ސަލާމް ވިދާޅުވިއެވެ.

"ގާނޫނާ ހިލާފަށް ތިބޭ ތިބުން ވީހާ ވެސް އަވަހަކަށް ނިމުމަކަށް ގެންނަންޖެހޭ" ފަނޑިޔާރު ނަވާފް ސަލާމް ވިދާޅުވިއެވެ.

މީގެ އިތުރުން، ވަޒަންވެރިކުރުވުމުގެ ހުރިހާ ހަރަކާތެއް އިޒްރޭލުން މިހާރުން މިހާރަށް ހުއްޓާލުމަށާއި ހިފާފައިވާ ބިންތަކުގައި ވަޒަންވެރިކޮށްފައިވާ މީހުން ވެސް އެތަނުން އެ ތަންތަން ދޫކޮށް ދާންޖެހޭނެ ކަމަށް އައިސީޖޭއިން ނެރެފައިވާ އެޑްވައިޒަރީ އޮޕީނިއަންގައި ބުނެފައިވެއެވެ.

އައިސީޖޭގެ ނިންމުމާއި މެދު ފަލަސްތީނުގެ ފޮރިން މިނިސްޓަރު ރިޔާދު އަލް މާލިކީ ވިދާޅުވީ މިއީ ތާރީހު ބަދަލުކޮށްލަދޭނެ ނިންމުމެއް ކަމަށެވެ.