އިޒްރޭލުން ވެރިވެގެންފައިވާ ފަލަސްތީނުގެ ބިންތަކުން އިޒްރޭލުން ފައިބަން ޖެހޭނެ ކަމަށް ކަނޑައަޅައި (އައިސީޖޭ) އިން ނެރެފައިވާ ލަފައަކީ ފަލަސްތީނުގެ ރައްޔިތުންނަށް ލިބުނު ބޮޑު ކާމިޔާބީއެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އދ. ގެ އެންމެ މަތީ ކޯޓު އިންޓަނޭޝަނަލް ކޯޓް އޮފް ޖަސްޓިސް އިން އިއްޔެ ނެރެފައިވާ އެޑްވައިޒަރީ އޮޕީނިއަން ނުވަތަ ލަފާގައި ބުނެފައިވަނީ މީގެ އެތައް އަހަރެއް ކުރިން ޔަހޫދީން ފަލަސްތީނުގެ ބިންތަކުގެ މައްޗަށް ވެރިވެފައި ވަނީ ގާނޫނާއި ޚިލާފަށް ކަމަށާއި އިޒްރޭލުން ވަޒަންވެރިކުރުވުމުގެ ހުރިހާ ހަރަކާތެއް މިހާރުން މިހާރަށް ހުއްޓާލައި ހިފާފައިވާ ބިންތަކުގައި ވަޒަންވެރިކޮށްފައިވާ މީހުން އެ ތަންތަން ދޫކޮށް ދާންޖެހޭނެ ކަމަށެވެ.

އައިސީޖޭ ލަފައާއިމެދު ރައީސް ޑރ. މުޢިއްޒު މިރޭ އެކްސްގައި ކުރެއްވި ޕޯސްޓެއްގައި އައިސީޖޭގެ ލަފައަށް މަރުހަބާ ދަންނަވާ ވިދާޅުވެފައިވަނީ އައިސީޖޭގެ ނިންމުމަކީ ފަލަސްތީނުގައި މިނިވަން ދައުލަތެއް އުފެއްދުމަށް އެ ގައުމުގެ ރައްޔިތުން ކުރާ މަސައްކަތަށް ލިބުނު ކާމިޔާބީއެއް ކަމަށެވެ.

Advertisement

މީގެއިތުރުން، ފަލަސްތީނުގެ ބިންތަކުން އިޒްރޭލުން ވަގުތުން ފޭބުމަށް ގޮވާލާ، އިޒްރޭލުން ފަލަސްތީނުގެ ބިންތަކަށް ދީފައިވާ ގެއްލުމަށް ބަދަލުދޭން ޖެހޭނެ ކަމަށް ވެސް ރައީސް ވިދާޅުވިއެވެ.

ރައީސް އިތުރަށް ވިދާޅުވީ އިރުމަތީ ގުދުސްއަކީ ފަލަސްތީނުގެ ވެރިރަށުގެ ގޮތުގައި ބަލައިގަނެ، ފަލަސްތީނުގައި މިނިވަން ދައުލަތެއް ގާއިމްކުރައްވަން ޖެހޭކަމަށެވެ.

ރާއްޖެއަކީ އިޒްރޭލުން ފަލަސްތީނާއި ދެކޮޅަށް ހިންގާ ލާއިންސާނީ އަމަލުތައް އަބަދުވެސް އެންމެ ހަރުކަށި އިބާރާތުން ކުށްވެރިކުރާ ގައުމެކެވެ. އަދި މިއަމަލުތައް ކުށްވެރިކުރުމުގެ ގޮތުން ރާއްޖެއިން އަމަލީގޮތުން ވެސް އިޒްރޭލާއި ދެކޮޅަށް އެތައް ފިޔަވަޅުތަކެއް ވަނީ އަޅާފައެވެ. އެގޮތުން، އިޒްރޭލުން ފަލަސްތީނަށް ދެމުންދާ ހަމަލާތަކާ ގުޅިގެން ރާއްޖެއިން އިޒްރޭލާ ދެމެދު އެއްވެސް ހާރިޖީ ގުޅުމެއް ނުބާއްވަ އެވެ. މީގެ އިތުރުން ސަރުކާރުން ވަނީ އިޒްރޭލްގެ ޕާސްޕޯޓް ރާއްޖޭގައި މަނާކުރަން މަޖިލީހަށް ބިލެއް ވެސް ހުށަހަޅައިފަ އެވެ.