ޔޫއެފާ ސީ ކޯޗިން ލައިސަންސް އިނގިރޭސިވިލާތުން ހާސިލުކުރި ފުރަތަމަ ދިވެއްސަކަށް އަލީ ވަހީދު (ބަލަކް) ހިމެނިއްޖެއެވެ.

އަލީ ވަހީދު ޔުއެފާ ސީ ކޯޗިން ލައިސެންސް ހޯދާފައިވާއިރު، ޔޫއެފާ ކޯޗިންގ ބެޖްތަކަކީ ދުނިޔޭގެ ފުޓުބޯޅައިގެ އެންމެ ވަރުގަދަ ލައިސަންސް ބެޖްތަކެވެ. އަލީ ވަހީދު ތަމްރީނުތައް ހާސިލުކުރަމުންދަނީ އިނގިރޭސި އެފް.އޭ އަދި ވޭލްސް އެފް.އޭގައެވެ. އަދި މީގެ އިތުރުން އަލީ ވަހީދު މިހާރުވަނީ މިއަހަރު ފަށާ ޔޫއެފާ ބީ ކޯހަށް އެންރޯލްވެފައެވެ.

އިނގިރޭސި އެފް.އޭ އަކީ ދުނިޔޭގެ ވަރުގަދަ ޕްރިމިއަރ ލީގުގެ ބެލެނިވެރި އިދާރާއެވެ. ވޭލްސް އެފް.އޭ އަކީ އާސެނަލްގެ ކޯޗު މިކެލް އާޓެޓާއާއި، ތިއަރީ އޮންރީ އަދި ޕެޓްރިކް ވިއޭރާ ފަދަ ތަރިން ޔޫއެފާގެ ކޯޗިންގ ތަމްރީނުތައް ހެދި އެފްއޭއެވެ.

Advertisement

ކުރިއަށް އޮތް ސެޕްޓެމްބަރު މަހު ފަށާ އިނގިރޭސި އާ ގްރާސް ރޫޓްސް ފުޓުބޯޅަ ސީޒަންގައި އަލީ ވަހީދުއާއި ވަނީ ސައުތު ލަންޑަން ފުޓުބޯޅަ ނެޓްވޯކްގެ ފްލެގްޝިޕް ޓީމް އޭ.އެފް.ސީ ސައުތު ލަންޑަންގެ ކޯޗުކަން ވެސް ހަވާލުކޮށްފައެވެ. އެޓީމަކީ ގްރާސް ރޫޓްސް ލީގުގެ ފުރަތަމަ ޑިވިޝަންގެ ޓީމެކެވެ.