ބަންގްލަދޭޝްގައި ތިބި ދިވެހީންގެ ހާލު ރަނގަޅު ކަމަށާއި އެގައުމުގައި މަތީ ތަޢުލީމު ހާސިލު ކުރާ ދެ ދަރިވަރަކު ރާއްޖެ އައުމަށް ސަރުކާރުން އެހީ ފޯރުކޮށްދީފައިވާ ކަމަށް ފޮރިން މިނިސްޓްރީން ބުނެފިއެވެ.

އެމިނިސްޓްރީން ހާމަކޮށްފައިވާ ގޮތުގައި އިއްޔެ ނެރުނު ނޫސް ބަޔާނެއްގައި ބުނެފައިވާ ގޮތުގައި ބަންގްލަދޭޝްގެ އުތުރުގެ މެޑިކަލް ސްކޫލްތަކުގައި ކިޔަވަމުންދާ ދެ ދަރިވަރަކު ވަނީ، އެ ސްކޫލްތައް ބަންދުކުރުމުން، އެނބުރި ރާއްޖެ އައުމަށް ގަސްދުކުރާކަން ހާމަކޮށްފައެވެ. އެހެންކަމުން އެ ގައުމުގައި ހުންނަ ރާއްޖޭގެ ހައިކޮމިޝަނާއި އިންޑިއާގައި ހުންނަ ރާއްޖޭގެ ހައިކޮމިޝަނުން އެހީތެރިކަމާއިއެކު މިދެކުދިން ވަނީ ރާއްޖެ ގެނައުމަށްޓަކައި ބަހުގައި ބަންގްލަދޭޝްގެ ބޯޑަރު ހުރަސްކޮށްފައި ކަމަށް މިނިސްޓްރީން ވަނީ ހާމަކޮށްފައެވެ.

ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނުން އެ ގައުމުގައި ތިބި ދިވެހީންގެ ހާލު ވަރަށް ގާތުން ބަލަމުން އަންނަ ކަމަށް އެމިނިސްޓްރީން ބުނެފައިވެއެވެ. ހައިކޮމިޝަނާއި ހަވާލާދީ މިނިސްޓްރީން ބުނެފައިވަނީ ހައިކޮމިޝަނުގައި ރެޖިސްޓްރީވެފައިވާ 90 ދަރިވަރުންނާއި، އާއިލާތަކާއި، އެކިއެކި ކަންކަމުގައި ބަންގްލަދޭޝްގައި ތިބި ދިވެހީންގެ ހާލު ޖުމްލަ ގޮތެއްގައި ރަނގަޅު ކަމަށެވެ.

Advertisement

ބަންގްލަދޭޝްގައި ކުރަމުންދާ މުޒާހަރާ އާއި ގުޅިގެން އެގައުމުން ކާފިއު އިއުލާންކުރުމާއި ގުޅިގެން ފޮރިން މިނިސްޓްރީން ވަނީ ބަންގްލަދޭޝް ސަރުކާރާއި ކައިކޮމިޝަނުގެ އިރުޝާދާއި އެއްގޮތަށް އަމަލުކުރުމަށް އެގައުމުގައި ދިރިއުޅޭ ދިވެހިންނަށް އިލްތިމާސް ކޮށްފައެވެ.

މީގެއިތުރުން، މިހަމަނުޖެހުމާއި ގުޅިގެން އެއްވެސް އެހީތެރިކަމެއް ބޭނުންވާ ނަމަ، ބަންގްލަދޭޝްގައި ހުންނަ ރާއްޖޭގެ ހައިކޮމިޝަންގެ ނަންބަރު 318 120 1708 880+ / 885 748 1329 880+ ގުޅޭނެ ކަމަށް ފޮރިން މިނިސްޓްރީން ވަނީ ބުނެފައެވެ.