ސެނެގާލްގެ އިދިކޮޅު ލީޑަރު އުސްމާނޭ ސޮންކޯގެ މައްޗަށް ދައުލަތުން އުފުލާފައިވަނީ ފިތުނައެއް ރޭވުމުގެ ދައުވާ އާއި އިތުރު އާދައުވާ ތަކެއް ކަމަށް އެގައުމުގެ ޕަބްލިކް ޕްރޮސެކިއުޓާ ވިދާޅުވެއްޖެއެވެ.

ހޮނިހިރު ދުވަހު މިކަން އިއުލާން ކޮށްފައިވަނީ މުޅި ގައުމުގައި ނުރައްކާތެރި ހަމަނުޖެހުންތައް ހިންގި ކުށް ސާބިތުވެ ދެ އަހަރަށް ޖަލަށް ލުމަށް ހުކުމް ކުރިތާ ހަފްތާތަކެއް ފަހުންނެވެ.

އާ ދައުވާތައް އުފުލާފައި ވަނީ ސެނެގާލްގެ ވެރިރަށް ޑަކާރުގެ ފުލުހުންގެ ކޯޓެއްގައި ހުކުރު ދުވަހު ސުވާލު ކުރުމަށް ގޭގައި ހުކުމް ތަންފީޒު ކުރަމުން އަންނަ ސޮންކޯ ބަންދުކުރުމާ ގުޅިގެންނެވެ.

އޭނާ އަދިވެސް ހުރީ ބަންދުގަ އެވެ.

ސެނެގާލްގެ ޕަބްލިކް ޕްރޮސެކިއުޓަރު އަބްދު ކަރީމް ޑިއޮޕް ނޫސްވެރިންނަށް ވިދާޅުވީ އާ ދައުވާތައް އުފެދިފައިވަނީ ސޮންކޯ ދެއްކި ވާހަކަތަކާއި އޭނާ ބޭއްވި އެއްވުންތަކުގެ ސަބަބުންކަމަށެވެ.

ފިތުނަވެރިކަން އުފެއްދުމުގެ އިތުރުން އާ ދައުވާތަކުގެ ތެރޭގައި ދައުލަތުގެ ސަލާމަތަށް ގެއްލުން ދިނުމާއި އާންމު ސަލާމަތަށް ނުރައްކާ ކުރުމާއި ސިޔާސީ ގޮތުން ބޮޑެތި ހަމަނުޖެހުންތައް އުފެއްދުމަށް އަމާޒުކޮށްގެން އަމަލުކުރުމާއި ޓެރަރިސްޓް ޖަމާއަތަކާ ގުޅުން އޮންނަ ކަމާއި ޖިނާއީ ގުޅުން ހިންގުމާއި ވައްކަން ހިމެނެ އެވެ.

ހުކުރު ދުވަހު އޭނާ ހައްޔަރުކުރީ އޭނާގެ ގެއިން ބޭރުގައި ތިބި ސަލާމަތީ ބާރުތަކާ އެކު ހިނގި މާރާމާރީއަކާ ގުޅިގެން ކަމަށެވެ.

މިދިޔަ ޖޫން މަހު އިދިކޮޅު ލީޑަރު ވަނީ މަސާޖު ޕާލާއެއްގައި މަސައްކަތް ކުރާ އަންހެނަކު ރޭޕްކޮށް މަރުގެ އިންޒާރު ދިނުމުގެ ތުހުމަތުން ބަރީއަވެފަ އެވެ. އެކަމަކު އޭނާގެ މައްޗަށް ސާބިތުވީ ޒުވާނުން ކޮރަޕްޓް ކުރުމުގެ ލުއި ހުކުމެއް ކަމަށާއި އޭގެ ތެރޭގައި 21 އަހަރުން ދަށުގެ މީހުންނާ ޖިންސީ ގުޅުން ހިންގުމަށް މަގާމުގެ ބޭނުން ނަހަމަ ގޮތުގައި ބޭނުން ކުރުން ހިމެނޭ ކަމަށެވެ.

ޒުވާނުން ކޮރަޕްޓް ކުރުމަކީ ސެނެގާލްގައި ޖިނާއީ ކުށެއް ކަމަށާއި އެ ކުށުގެ އަދަބަކީ ފަސް އަހަރަށް ޖަލަށްލުމާއި 6،000 ޑޮލަރަށް ވުރެ ގިނައިން ޖޫރިމަނާ ކުރުމެވެ.

މި ކުށް ސާބިތުވުމުން މުޅި ގައުމުގައި ސޮންކޯގެ ސަޕޯޓަރުންނާއި ފުލުހުންނާ ދެމެދު ހަމަނުޖެހުންތަކެއް ހިނގައި 16 މީހުން މަރުވެ ދިހަވަރަކަށް މީހުން ޒަޚަމްވެފައިވެއެވެ.