ދިވެހި ސަރުކާރުން މާލެ އާއި ވިލިމާލޭގެ މަގުތައް ތަރައްގީ ކުރުމަށްޓަކައި ޗައިނާ ސަރުކާރާއިއެކު ލެޓާ އޮފް އެކްސްޗޭންޖްގައި ސޮއި ކޮށްފިއެވެ.

މާލެ އާއި ވިލިމާލޭގެ މަގުތައް ތަރައްގީ ކުރުމަށްޓަކައި ޗައިނާ އާއިއެކު ސޮއިކޮށްފައިވާ ލެޓާ އޮފް އެކްސްޗޭންޖްއަށްފަހު، މި މަޝްރޫއުގެ ފީސިބިލިޓީ ސްޓަޑީގެ މަސައްކަތް ފެށިގެންދާނެ ކަމަށް ކޮންސްޓްރަކްޝަން މިނިސްޓްރީއިން ވަނީ ބުނެފައެވެ.

މިމަސައްކަތުގެ އަމަލީ މަސައްކަތް ފެށުމަށްޓަކައި ފުރިހަމަ ކުރަންޖެހޭ ކަންކަން މިހާރު ކުރިއަށްގެންދާއިރު، މާލެއާއި ވިލިމާލޭގެ މަގުތައް އަލުން ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅުތަކުގެ ތެރެއިން ވައުދެކެވެ.

Advertisement

ރާއްޖެ އާއި ޗައިނާ އާއި ދެމެދު ސޮއިކޮށްފައިވާ ލެޓާ އޮފް އެކްސްޗޭންޖްގައި ދިވެހިސަރުކާރުގެ ފަރާތުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ސޮއިކޮށްފައިވާއިރު، ޗައިނާގެ ފަރާތުން މިއެލްއޯއީގައި ސޮއިކޮށްފައިވަނީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން (ސިޑްކާ)ގެ ޗެއާމަން ލިއޯ ޒައޯހުއި އެވެ.

މި އަހަރުގެ ކުރީކޮޅު ރައީސް މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގައި ޗައިނާއިން ވަނީ ރާއްޖެއަށް އެންމެ މުހިންމު ދާއިރާތަކުން އެހީތެރިވެދޭނެ ކަމަށް ބުނެފައެވެ. މީގެ އިތުރުން، ތަރައްގީގެ މަޝްރޫއުތަކަށް އެހީވުމަށްޓަކައި ހިލޭއެހީގެ ގޮތުގައި 130 މިލިއަން ޑޮލަރު ހަމަޖައްސަވާދެއްވާފައިވާ ކަމަށް ރައީސް ވަނީ ވިދާޅުވެފައެވެ.