ކުރީގެ ރައީސް އިބްރާހިމް މުހައްމަދު ސޯލިހްގެ ދަތުރުފުޅުގެ ހަރަދުތައް ހާމަނުކުރުމުން އިސްތިއުނާފް ކުރުމަށް ސުޕްރީމް ކޯޓަށް ހުށަހަޅައި ބަލަމުންދާ މައްސަލަ ބާތިލްކޮށް އަނބުރާ ގެނައުމަށް އެޓާނީ ޖެނެރަލް އޮފީހުން ނިންމައިފިއެވެ.

އިންފޮމޭޝަން ކޮމިޝަނަރުގެ އޮފީހުން ވަނީ ރައީސް ސޯލިހް ރާއްޖެއިން ބޭރަށް ކުރެއްވި ދަތުރުފުޅާ ގުޅިގެން ސަރުކާރުން ކުރި އެންމެހައި ހަރަދުތަކާ ގުޅޭ ރަސީދުތަކުގެ ކޮޕީ ހޯދަން އެދުނު ފަރާތަކަށް މައުލޫމާތު ހިއްސާ ކުރުމަށް ނިންމާފައެވެ. ނަމަވެސް އެނިންމުން އިސްތިއުނާފު ކޮށްދިނުމަށްއެދި ހައިކޯޓަށް މައްސަލަ ހުށަހެޅުމުން ހައިކޯޓުން ވަނީ އިންފޮމޭޝަން ކޮމިޝަނަރުގެ ނިންމެވުމަށް ބަދަލު ގެންނަން ޖެހޭނެ ތަނެއް ނެތް ކަމަށް ކަނޑައަޅާފައެވެ.

ހައިކޯޓުގެ ނިންމުން އިސްތިއުނާފު ކުރުމަށް ރައީސް އޮފީހުން އޭރު އެދުމުން އެޓާނީ ޖެނެރަލް އޮފީހުން ވަނީ މި މަހުގެ 7 ވަނަ ދުވަހު އެމައްސަލަ އިސްތިއުނާފު ކުރުމަށް ސުޕްރީމް ކޯޓަށް ހުށަހަޅާފައެވެ.

Advertisement

އެޓާނީ ޖެނެރަލް އޮފީހުން ބުނެފައިވާ ގޮތުގައި ދިވެހިރާއްޖޭގެ ސުޕްރީމް ކޯޓުގައި އިސްތިއުނާފުކޮށް އެ ކޯޓުގެ ނަންބަރު ބަލަމުން ގެންދާ މި މައްސަލައަކީ، މައިގަނޑު ގޮތެއްގައި މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 21 ވަނަ މާއްދާ އާއި 76 ވަނަ މާއްދާގެ (ނ) ދިވެހިރާއްޖޭގެ ހައިކޯޓުން މާނަކުރާ ގޮތާ ގުޅޭގޮތުން ގޮތެއް ކަނޑައެޅުއްވުމަށް އިސްތިއުނާފުކުރި މައްސަލައެއް ކަމަށެވެ.

އެޓާނީ ޖެނެރަލްގެ އޮފީހުން ވަނީ ހައިކޯޓުގެ ނިންމުން އަލުން ދިރާސާ ކުރުމަށްފަހު، ސުޕްރީމް ކޯޓުން ބަލަމުން ގެންދާ އެ މައްސަލަ އަނބުރާ ގެނައުމަށް މިހާރު ނިންމާ، އިސްތިއުނާފު ފޯމު ބާތިލްކުރުމަށް އެދި ސުޕްރީމް ކޯޓަށް ހުށަހަޅާފައެވެ.