ބެލަރޫސްގައި ތިބި ރަޝިޔާގެ ވެގްނަރ ސިފައިން ޕޮލިޝް ބޯޑަރާއި ދިމާލަށް ދަތުރުކުރަމުންދާތީ ޕޮލެންޑްގެ ބޮޑުވަޒީރު މަޓިއުސް މޮރަވިއެކީ ކަންބޮޑުވުން ފާޅުކުރައްވައިފިއެވެ.

"އަޅުގަނޑުމެންނަށް މައުލޫމާތު ލިބިފައި އޮތީ ބެލަރޫސްގެ ގްރޮޑްނޯއާ މާ ދުރުގައި އޮންނަ ސުވާލްކީ ގޭޕާ ދިމާއަށް ވެގްނަރުގެ ކުލީ ސިފައިންގެ 100 އަށް ވުރެ ގިނަ ސިފައިން ކުރިއަށް ގޮސްފައިވާ ކަމުގެ މައުލޫމާތު،" ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި މޮރަވިއެކީ ވިދާޅުވި އެވެ.

މިކަމުގެ ސަބަބުން ބޯޑަރުގެ ހާލަތު "އިތުރަށް ނުރައްކާތެރި" ވެގެންދާ ކަމަށް ޕޮލެންޑްގެ ދެކުނުގެ ގްލިވިސްގައި ހުންނަ ހަތިޔާރު އުފައްދާ ފެކްޓްރީއަކަށް ޒިޔާރަތް ކުރައްވައި  މޮރަވޮއެކީ ވަނީ އިންޒާރު ދެއްވާފަ އެވެ.

ގްރޮޑްނޯ އަކީ ބެލަރޫސްގެ ހުޅަނގުގައި، ނޭޓޯގެ މެމްބަރު ޕޮލެންޑާއި ލިތުއޭނިއާއާ އެކު އޮންނަ ބޯޑަރާ ގާތްގަނޑަކަށް 15 ކިލޯމީޓަރު (ނުވަ މޭލު) ދުރުގަ އޮންނަ އަވަށެކެވެ. ސުވާލްކީ ގޭޕަކީ ބެލަރޫސް އާއި ރަޝިޔާގެ ބާލްޓިކް އެކްސްކްލޭވް އޮފް ކަލިނިންގްރަޑް އާއި ދެމެދު އޮންނަ ހަނި ސްޓްރެޓެޖިކް ލޭންޑް ކޯރިޑޯއެކެވެ.

ޔޫރަޕިއަން ޔޫނިއަން އާއި ނޭޓޯގެ މެމްބަރު ޕޮލެންޑުން ވަނީ ރަޝިޔާގެ އެކުވެރި ބެލަރޫސް އާއި އިރުމަތީ ބޯޑަރުގައި އޮންނަ ޔޫކްރޭނާ އެކު ސަލާމަތާ މެދު ކަންބޮޑުވެފަ އެވެ.

އެ ބިރުވެރިކަން ބޮޑުވެފައިވަނީ މިއަހަރުގެ ކުރީކޮޅު އެ ގްރޫޕްގެ ކުރު މުއްދަތެއްގެ ބަޣާވާތަކަށް ފަހު ވެގްނަރ ގްރޫޕްގެ ކުލީ ސިފައިން ބެލަރޫސްއަށް އައި ފަހުންނެވެ.

ޕޮލެންޑާއި ބެލަރޫސް ބޯޑަރަކީ މެދުއިރުމައްޗާއި އެފްރިކާއިން ގިނަ އަދަދެއްގެ ރެފިއުޖީންނާއި ހިޖުރަވެރިން ޔޫރަޕްގެ ގައުމުތަކަށް ވަނުމަށް ބޭނުންކުރާ ތަނެކެވެ.

ޕޮލެންޑްގެ ސަރުކާރުން ތުހުމަތު ކުރަނީ ރަޝިޔާ އާއި ބެލަރޫސް އިން ހިޖުރަވެރިން ބޭނުން ކުރަނީ ޕޮލެންޑާއި އީޔޫގެ އެހެން ގައުމުތަކަށް ހަމަނުޖެހުން ގެނައުމަށެވެ. އަދި މިކަމަކީ ހައިބްރިޑް ހަނގުރާމައެއްގެ ގޮތަށް ޕޮލެންޑް ސަރުކާރުން ސިފަކުރާއިރު، މިކަން ހުއްޓުވުމަށް ބެލަރޫސްއާ އެކު އޮންނަ ބޯޑަރުގެ ބައެއްގައި ވަނީ އުސްފާރެއްވެސް ހަދާފައެވެ.

މި މަހުގެ ކުރީކޮޅު ޕޮލެންޑުން ވަނީ 1،000 އަށް ވުރެ ގިނަ ސިފައިން އެގައުމުގެ އިރުމައްޗަށް ބަދަލުކުރަން ފަށާފަ އެވެ.

މޮރަވިއެކްކީ ފާހަގަކުރެއްވި ގޮތުގައި މިއަހަރުގެ މިހާތަނަށް ބެލަރޫސް އިން ހިޖުރަ ކުރަން އުޅުނު 16،000 މީހުން ރެކޯޑް ކުރެވިފައިވެ އެވެ. ބެލަރޫސްގެ ރައީސް އެލެގްޒެންޑަރ ލުކަޝެންކޯ އާއި ރަޝިޔާގެ ރައީސް ވްލަޑިމިއާ ޕޫޓިން ބޭނުންވީ "އެމީހުން ޕޮލެންޑަށް ކޮއްޕާލަން" ކަމަށް ވެސް އޭނާ ވިދާޅުވި އެވެ.

"ހާލަތު ނުރައްކާތެރިވަމުން ދަނީ... ބޮޑަށް ބެލެވެނީ އެމީހުން [ވެގްނަރގެ ސިފައިން] ބެލަރޫސްގެ ބޯޑަރު ގާޑުގެ ގޮތުގައި ހެދިގެން ގަވާއިދާ ހިލާފަށް އުޅޭ މީހުން ޕޮލެންޑްގެ ސަރަހައްދަށް ދިއުމަށް އެހީތެރިވެ [އަދި] ޕޮލެންޑްގެ ހަމަޖެހުން ގެއްލިގެންދާނެ،" އޭނާ ވިދާޅުވި އެވެ.

ހުކުރު ދުވަހު ޕޮލެންޑްގެ ގަވަނިން ޕާޓީގެ ޗެއާމަން ޖަރޮސްލާވް ކަޗިންސްކީ ވިދާޅުވީ ވެގްނާގެ ހަނގުރާމަވެރިން "ބެލަރޫސްގައި ތިބީ މަޖާ ކުރަން ނޫން" ކަމަށެވެ.