މަސްތުވާތަކެއްޗާއިއެކު ހައްޔަރުކުރި މީހަކު އުމުރަށް ޖަލަށް ލުމާއެކު އެއްލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ޙުކުމް ކޮށްފިއެވެ.

މިމައްސަލައިގައި ކްރިމިނަލް ކޯޓުން ޙުކުމް ކުރި މީހާ ފުލުހުން ހައްޔަރު ކޮށްފައިވަނީ މާޗް 24، 2019 ގައި މާލެ ނޯތު ހާބަރު ބޭރު ތޮށީގައި އޮތް ރަންދޫ ބޯޓުން މަސްތުވާތަކެތި ހިފައިގެން ފުރަން އުޅޭކަމަށް ފުލުހުންނަށް ލިބުނު މައުލޫމާތަކާއި ގުޅިގެންނެވެ.

އޭނާގެ މައްޗަށް ދައުލަތުން ކޮށްފައިވާ ދައުވާގައި ބަޔާންކޮށްފައިވާ ގޮތުގައި ފުލުހުންނަށް ލިބުނު މައުލޫމާތު ގުޅިގެން އޭނާ ފުލުހުންގެ ބެލުމުގެ ދަށަށް ގެންގޮސް ޗެކްކުރުމުން އޭނާގެ ކޮނޑުގައި އަޅުވާފައިވާ ދަބަހެއްގެ ތެރޭގައި އޮތް ކެމަލް ބްރޭންޑުގެ ސިނގިރޭޓު ފޮއްޓެގެ ތެރެއިން ފެނުނު ފިލްމު ހުސްކުރި ދަޅެއްގައި 21.3660 ގްރާމް ކެނެބިސް ހުރިކަމަށް ތަހުލީލު ތަކުން ދައްކައެވެ.

މި މައްސަލައިގައި ދައުލަތުން އޭނާގެ މައްޗަށް ދައުވާކޮށްފައިވަނީ މަސްތުވާތަކެއްޗާ ބެހޭ ގާނޫނުގެ ދަށުން ކެނެބިސް ޓްރެފިކް ކުރުމުގެ ދައުވާ އަދި އޭނާގެ ކުޑަކަމުދާތަކެތި، މަސްތުވާތަކެތީގެ ބާވަތެއް ކަމުގައިވާ ކެނަބިސް އަށް ޕޮޒިޓިވް ވެފައި ހުރުމުން ކެނަބިސް ބޭނުން ކުރުމުގެ ދައުވާ އެވެ.

ދައުލަތުން އޭނާޣެ މައްޗަށް ކޮށްފައިވާ ދައުވާ ސާބިތުކުރުމަށް ހެކީގެ ގޮތުގައި 4 ފުލުހެއްގެ ހެކިބަހާއި، މަސްތުވާތަކެތީގެ ތަހުލީލު ރިޕޯޓާއި އިތުރު އެހެން ހެކި ވަނީ ހުށަހަޅާފައެވެ.

ދައުވާލިބޭ ފަރާތުން ދައުލަތުން އޭނާގެ މައްޗަށް ކޮށްފައިވާ ދައުވާއަށް އިންކާރުކޮށް ބުނެފައި ވަނީ އެ ދަބަހުގައި ހުރި މަސްތުވާ ތަކެއްޗަކީ އެހެން މީހަކު އެ ދަބަހަށް ލާފައިވާ އެއްޗެއް ކަމަށާއި ދަބަސް ހުރީ އޭނާގެ ފަހަތުން އަޅުވާފައި އަދި ދަބަހުގައި ތަޅުލާފައި ނެތުމުން އެހެން މީހަކަށް އެ ދަބަހަށް މަސްތުވާތަކެތި ލުމުގެ ފުރުސަތު އެބައޮތް ކަމަށެވެ.

މިމައްސަލައިގައި ޙުކުމް ކުރައްވަމުން ގާޟީ ވިދާޅުވީ ދައުލަތުން ދައުވާލިބޭ ފަރާތާއި ދެކޮޅަށް ހުށަހަޅާފައިވާ ހެއްކާއި ގަރީނާއަށް ރިއާޔަތްކޮށް ޝައްކެއް ނެތް މިންވަރަށް ދައުވާ ސާބިތުވާ ކަމަށެވެ.

ކްރިމިނަލް ކޯޓުން ވަނީ ދައުވާލިބޭ ފަރާތުގެ މައްޗަށް ޝައްކެއް ނެތް މިންވަރަށް ކުށް ސާބިތުވާ ކަމަށް ކަނޑައަޅުއްވާ އަދަބެއްގެ ގޮތުން އުމުރަށް ޖަލަށް ލުމާއެކު އެއްލައްކަ ރުފިޔާއިން ޖޫރިމަނާ ކުރުމަށް ޙުކުމްކޮށްފައެވެ.

ކްރިމިނަލް ކޯޓުން މިމައްސަލައިގައި އަދަބު ކަނޑައަޅާފައިވަނީ ތަހުގީގު މުއްދަތުގައި އޭނާ ޖަލުގައި ހޭދަކޮށްފައިވާ 1 އަހަރާއި 2 މަސް ދުވަސް ހުކުމުން އުނިކުރުމަށް ފަހު އޭނާގެ ޙުކުމުން ބާކީ އޮތް 23 އަހަރާއި، 10 ދުވަހަށް ޖަލަށް ލުމަށާއި އެއްލައްކަ ރުފިޔާއިން ޖޫރިމަނާ ކުރުމަށެވެ.