ދިވެހިރާއްޖޭގެ 59 ވަނަ މިނިވަން ދުވަހުގެ މުނާސަބަތުގައި މޯލްޑިވްސް ނެޝަނަލް ޑިފެންސް ފޯސްއިން މާދަމާ "ޝަރަފުގެ ހިނގާލުން" މާލޭ ސިޓީގައި ބޭއްވުމަށް ނިންމައިފިއެވެ.

އެމްއެންޑީއެފް އިން ހާމަކޮށްފައިވާ ގޮތުގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ.މުޙައްމަދު މުޢިއްޒު ޝަރަފުވެރިކޮށްދެއްވާ ޝަރަފުގެ ހިނގާލުން ފަށާނީ، މާދަމާ ހަވީރު 4:15 ގައި ބަންޑާރަކޮށިންނެވެ.

ބަންޑާރަކޮށިން ފަށާ މިހިނގާލުން ކަޅުތުއްކަލާކޮށްޓަށް ނިންމާލާއިރު، ޖުމްލަ ފަސް ތަނެއްގައި ލަޝްކަރު ހުއްޓުމަށް ހަމަޖެހިފައިވާ ކަމަށް އެމްއެންޑީއެފް އިން ބުނެފައިވެއެވެ. އަދި މިއިން ކޮންމެ ތަނެއްގައި މިލިޓަރީ ބޭންޑުގައި ރާގު ކުޅޭނެ ކަމަށް ވެސް އެމްއެންޑީއެފް އިން ބުނެފައިވެއެވެ.

Advertisement

ސަރުކާރުން ވަނީ ސަރުކާރުގެ ހަރަދު ކުޑަ ކުރުމުގެ ސިޔާސަތުގެ ދަށުން މިނިވަން ދުވަހާއި ޢާންމުކޮށް ބާއްވަމުން އަންނަ ފުޅަނދު ބުރާއި، ކުޅިވަރުތަކާއި ރިސެޕްޝަންފަދަ ހަރަކާތްތައް ނުބާއްވަން ނިންމާފައެވެ.

މިނިވަން ދުވަހުގެ މުނާސަބަތުގައި ކުޅިވަރު ހަރަކާތްތައް ނުބޭއްވި ކަމުގައިވީ ނަމަވެސް އެހެން އަހަރުތަކެކޭ އެއްފަދައިން މިއަހަރުގެ މިނިވަން ދުވަހުވެސް ދިދަ ނެގުމުގެ ރަސްމިއްޔާތު މާދަމާ ހެނދުނު ޖުމްހޫރީ މައިދާނުގައި އޮންނާނެއެވެ. މީގެ އިތުރުން، މިނިވަން ދުވަހުގެ ރަސްމީ ޖަލްސާ މާދަމާރޭ ސޯޝަލް ސެންޓަރުގައި ބާއްވާއިރު، މި ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޤައުމާ މުޚާޠަބުކުރައްވާނެކަމަށް ރައީސް އޮފީހުން ވަނީ ހާމަކޮށްފައެވެ.