އިޒްރޭލުން ގާޒާއަށް ދެމުންދާ ހަމަލާތަކުގައި ހަލާކުވެފައިވާ ގާޒާގެ މަސްގަތު ސިއްހީ މަރުކަޒު އަލުން ބިނާ ކުރުމުގެ މަސައްކަތް އިންޓަނޭޝަނަލް އެއިޑް ކެމްޕެއިން (އައިއޭސީ) އިން މަސައްކަތް ފަށައިފިއެވެ.

ދިވެހިންގެ އެހީ ގާޒާއަށް ފޯރުކޮށްދިނުމަށް ކުރަމުންދާ މަސައްކަތުގައި މިއަދަކީ ވަރަށް އުފާވެރި ދުވަހެއްގެ ގޮތުގައި ފާހަގަ ކުރަމުން އިންޓަނޭޝަނަލް އެއިޑް ކެމްޕެއިން (އައިއޭސީ) އިން ބުނެފައި ވަނީ އުތުރު ގާޒާގެ މެދުގައިވާ ޝިޖާއިއްޔާ އަވަށުގައި ހުންނަ "މަސްގަތު ސިއްހީ މަރުކަޒު" އަލުން ބިނާކުރުމުގެ މަސައްކަތް ފަށަން ތައްޔާރު ވެފައިވާ ކަމަށެވެ.

އައިއޭސީ ބުނީ ގާޒާގެ މަސްގަތު ސިއްހީ މަރުކަޒު ލިބުނު ގެއްލުންތައް ދެނެގަނެ، މަސައްކަތަށް ބޭނުންވާ ތަކެތި ހޯދާ ޕްލޭންކުރުމުގެ މަރްހަލާ މިހާރު ނިންމާލާފައިވާ ކަމަށެވެ.

Advertisement

އައިއޭސީ އިން ހާމަކޮށްފައިވާ ގޮތުގައި މި މަރުކަޒަކީ އެ އަވަށުގައި ހުންނަ ހަމައެކަނި ސިއްހީ ފަރުވާދޭ މަރުކަޒު ކަމަށެވެ. އުތުރު ގާޒާގައި އެންމެ ގިނައިން މީހުން އުޅޭ މި އަވަށުގައި ވީހާވެސް ގިނަ މީހުންނަށް ފަރުވާ ދިނުމަށްޓަކައި މި މަރުކަޒު މަރާމާތުކުރުން ވަރަށް މުހިންމު ކަމަށް އައިއޭސީ އިން ބުނެފައިވެއެވެ. އަދި މިމަރުކަޒު ހަދާ ނިމޭ އިރު ކުޑަ ހޮސްޕިޓަލަކަށް ވެގެންދާނެ ކަމަށް ވެސް އައިއޭސީ އިން ބުނެފައިވެއެވެ.