ދައުލަތަށް ލިބެންޖެހޭ ފައިސާގެ ތެރެއިން ބިމުގެ ކުލީގެ ގޮތުގައި ލިބެންޖެހޭ 513 މިލިއަން އެމެރިކާ ޑޮލަރު ލިބިފައި ނުވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

މިނިވަންދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ދައުލަތަށް ލިބެންޖެހޭ އެތައް ބިލިޔަން ރުފިޔާއެއް ނުހޯދައި ފާއިތުވި ސަރުކާރުތަކުން ދޫކޮށްލާފައި ވާކަމަށާއި މިހާތަނަށް ޖުމްލަ 13 ބިލިޔަނަށް ވުރެ ގިނަ ރުފިޔާ ނުލިބި އެބަހުރި ކަމަށެވެ.

ރައީސް ވިދާޅުވީ މީގެ ތެރޭގައި ގިނައީ ބިމު ކުލީގެ ގޮތުގައި ލިބެންޖެހޭ ފައިސާއާއި ޓެކުހުގެ ގޮތުގައި ލިބެންޖެހޭ ފައިސާކަމަށާއި އެމަނިކުފާނު ވެރިކަމާ ހަވާލުވެ ވަޑައިގެންނެވިއިރު ބިމުގެ ކުލީގެ ގޮތުގައި ނުހޯދާ އެކަމު ދައުލަތަށް ލިބެންޖެހޭ ރައްޔިތުންގެ ފައިސާގެ އަދަދު 513 މިލިޔަން ޑޮލަރަށް އަރާކަމަށެވެ.

Advertisement

މީގެ އިތުރުން ޓީޖީއެސްޓީގެ ގޮތުގައި 102 މިލިއަން އެމެރިކާ ޑޮލަރު، ޖީއެސްޓީ ގޮތުގައި 3.3 ބިލިއަން ރުފިޔާ، ކޯޕަރޭޓް އިންކަމް ޓެކްސްގެ ގޮތުގައި 1 ބިލިއަން ރުފިޔާ ނުލިބި އެބަހުރިކަމަށް ވެސް ރައީސް ވިދާޅުވިއެވެ.

ދައުލަތަށް ލިބެންޖެހޭ ފައިސާގެ ތަފްސީލް ދިނުމަށްފަހު ރައީސް ވިދާޅުވީ މި ފައިސާ ހޯދިއްޖެނަމަ މިއީ ދައުލަތުގެ ދަރަނީގެ މައްސަލަ އެއްކޮށްހެން ހައްލު ކުރެވޭނެވަރުގެ އަދަދެއް ކަމަށެވެ. އެހެންނަމަވެސް މިފައިސާ ހޯދުމަށް ކުރީގެ އެއްވެސް ސަރުކާރަކުން އެކަށީގެންވާ ގޮތެއްގައި މަސައްކަތް ކޮށްފައި ނުވާ ކަމަށް އެމަނިކުފާނު ފާހަގަކުރެއްވިއެވެ.

މިނިވަންދުވަހުގެ ރަސްމީ ހަފްލާގައި ވާހަކަފުޅު ދައްކަވަމުން ރައީސް ވަނީ ދައުލަތައް ލިބެންޖެހޭ މި ފައިސާ ހޯއްދަވާނެ ކަމަށް ވެސް ވިދާޅުވެފައެވެ.

ދިއްގަރު ދާއިރާގެ މެންބަރު އަހްމަދު ނާޒިމް އާންމު ކުރައްވައިފައިވާ މީރާގެ ތާފާސް ހިސާބުތަކަށް ބަލާއިރު އެކި ހިދުމަތްތަކުން ނަގާ ޓެކްސްއާއި ބިމު ކުލި އެއްކުރީމައި ލިބެންޖެހޭ އަދަދު 15،445،526،584.29 (15 ބިލިއަން ރުފިޔާ) ދައުލަތަށް ލިބެންޖެހެއެވެ.