މާލޭގެ ގެއަކަށް މީހަކު ވައްދާ ބިރުދައްކައިގެން ފޭރުނު މައްސަލައެއްގައި ދެމީހަކު ހައްޔަރު ކޮށްފިއެވެ.

ފުލުހުން ހާމަކޮށްފައިވާ ގޮތުގައި މިހާދިސާ ހިނގާފައި ވަނީ މި މަހުގެ 24 ވަނަ ދުވަހު މާލޭގެ ގެއަކަށް މީހަކު ވައްދާ އޭނާ ބަރަހަނާކޮށް ބިރުދައްކައިގެންނެވެ. އޭނާއަށް ބިރުދެއްކުމަށްފަހު، ކޭޝް ކާޑުގެ ޕިން ހޯދުމަށްފަހު އެކައުންޓުގައިވާ ފައިސާ ފޭރުނު ކަމަށް ފުލުހުން މައުލޫމާތު ދީފައިވެއެވެ.

މިމައްސަލާގައި މިހާތަނަށް ކޯޓު އަމުރެއްގެ ދަށުން 26 އަހަރާއި 35 އަހަރުގެ ދެ ފިރިހެނުން ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.

Advertisement

މީގެ އިތުރުން އެ މީހުންގެ ބަންދާ މެދު ގޮތެއް ކަނޑައެޅުމަށް ކޯޓަށް ހާޒިރު ކުރުމުން އެކަކުގެ ބަންދަށް 30 ދުވަސް އަދި އަނެކަކުގެ ބަންދަށް 60 ދުވަސް ޖަހާފައިވާ ކަމަށް ފުލުހުން ބުނެފައިވެއެވެ.

މިމައްސަލަ އާއި ގުޅިގެން ހައްޔަރުކޮށްފައިވާ މީހުންނާއި ގުޅޭ އިތުރު މައުލޫމާތު ފުލުހުން ހާމަކޮށްފައެއް ނުވާއިރު، ފުލުހުން ދަނީ މިމައްސަލަ ތަހުގީގު ކުރަމުންނެވެ.