ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) ފީއެންސީގެ ޕާލިމަންޓަރީ ގްރޫޕްގެ ޑެޕިއުޓީ ލީޑަރު ކަމުން އިސްތިއުފާ ދެއްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ޓޮމް ވިދާޅުވީ ޕީއެންސީގެ ޕާލިމަންޓަރީ ގްރޫޕްގެ ޑެޕިއުޓީ ލީޑަރުކަމުން އިސްތިއުފާދިނީ، މިވަގުތު އަމިއްލަކަންކަން ހުރިގޮތުން އެ މަސްއޫލިއްޔަތު އަދާކުރުމަށް ވަގުތު ދެވެންނެތުމުގެ ސަބަބުން ކަމަށެވެ.

19 ވަނަ ރައްޔިތުންގެ މަޖިލީހުގައި މަހިބަދޫ ދާއިރާ ތަމްސީލް ކުރެއްވި ޓޮމް މިއަހަރު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ކަމަށް ވެސް ވަނީ ކުރިމަތި ލާފައެވެ.

Advertisement

މީގެކުރިންވެސް 2016 ވަނަ އަހަރު ޓޮމް ވަނީ އެފްއޭއެމްގެ ރައީސްކަން ކުރައްވާފައެވެ. ޓޮމް 4 މަސްދުވަސް ވަންދެން އެމަގާމު އަދާކޮށްފައިވާއިރު، އެފަހަރު ޓޮމް ވަނީ އެކްސްކޯއަށް ނާންގާ އޭރުގެ އެފްއޭއެމްގެ ޖެނެރަލް ސެކްރެޓަރީ މަޤާމުން ވަކިކުރައްވާފައެވެ. އޭގެ ސަބަބުން އެކްސްކޯގެ ފަސް މެންބަރުން އެއްފަހަރާ އިސްތިއުފާ ދީފައިވާއިރު،  އެއަހަރުގެ ނޮވެމްބަރު މަހު ބޭއްވި އިންތިޚާބުގައި ޓޮމް އެފްއޭއެމްގެ ރައީސްގެ މަގާމަށް ވާދަކޮށްވަނީ ބަލިވެފައެވެ. އެފަހަރު އެމަގާމަށް ހޮވިފައި ވަނީ ބައްސާމް އެވެ.