ޕްރޮގްރާމް އެކްރެޑިޓޭޝަން ގަވާއިދާ ހިލާފުވުމުގެ ސަބަބުން އެވިޑް ކޮލެޖާއި ކްލިކް ކޮލެޖަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ފިޔަވަޅު އަޅައިފި އެވެ.

ޕްރޮގްރާމް އެކްރެޑިޓޭޝަން ގަވާއިދާ ހިލާފުވުމުގެ ސަބަބުން މިދެކޮލެޖްގެ މައްޗަށް ފިޔަވަޅު އަޅާފައިވާ އިރު، ކްލިކް ކޮލެޖްގެ މައްޗަށް ފިޔަވަޅު އެޅާފައިވަނީ އެމްކިއުއެގެ ހުއްދަ ނުހޯދައި އީ ލާނިން ޑެލިވަރީ މޮޑަލިޓީގެ ދަށުން އެ ކޮލެޖުން ޕްރޮގްރާމް ހިންގާފައިވާތީ އެވެ.

އެމްކިއުއޭ އިން ރޭ ކުރި އިއުލާނެއްގައި ހާމަކޮށްފައިވާ ގޮތުގައި ކޮވިޑް-19އާ ގުޅިގެން ރާއްޖޭގެ މަތީ ތައުލީމް ދޭ ހުރިހާ މަރުކަޒުތަކަށް އީ ލާނިން ޑެލިވަރީ މޮޑަލިޓީ ނުވަތަ އޮންލައިންކޮށް، އެ މަރުކަޒުތަކުން އެޕްރޫވް ކޮށްފައިވާ ޕްރޮގްރާމްތައް ހިންގުމުގެ އާއްމު ހުއްދައެއް ދިން ކަމަށާއި ކޮވިޑުން އަރައިގަނެ އާއްމު ހާލަތަކަށް އައުމާ އެކު އެ އިއުލާން އުވާލާފައިވާ ކަމަށެވެ.

އެމްކިއުއޭ އިން ހާމަކޮށްފައިވާ ގޮތުގައި ކޮވިޑް-19ގެ ކުރިން ކްލިކް ކޮލެޖުން އީ ލާނިން ޑެލިވަރީ މޮޑެލިޓީގެ ދަށުން އެއްވެސް ޕްރޮގްރާމެއް ހިންގުމަށް ހުއްދަ ނަގާފައި ނުވާ ކަމަށެވެ.

އެމްކިއުއޭ އިން ބުނުފައިވާ ގޮތުގައި ކްލިކް ކޮލެޖުން ހިންގަމުން އަންނަ ބެޗްލާ އޮފް ބިޒްނަސް މެނޭޖްމަންޓް" ޕްރޮގްރާމަކީ އެމްކިއުއޭ އިން 2019 ވަނަ އަހަރު، ފޭސް ޓު ފޭސްކޮށް ހިންގަން ހުއްދަ ދީފައިވާ ޕްރޮގްރާމެއް ކަމަށާއި މިހާތަނަށް މި ޕްރޮގްރާމް ކްލިކް ކޮލެޖުން އިސްތިހާރުކޮށް ހިންގަނީ އީ ލާނިން ޑެލިވަރީ މޮޑަލިޓީން ކަން އެ އޮތޯރިޓީ އަށް ދަރިވަރުން ހުށަހަޅާފައިވާ ޝަކުވާތަކުން އެނގޭ ކަމަށެވެ.

މީގެ އިތުރުން ކްލިކް ކޮލެޖްގެ އިންސްޓަގްރާމް ޕޭޖުންނާއި ކްލިކް ކޮލެޖްގެ ވެބްސައިޓުން ފޭސް ޓު ފޭސްކޮށް ހިންގަން ހުއްދަ ދީފައިވާ އެހެން ކޯސްތަކާއި ޕްރޮގްރާމްތައް އީ ލާނިން ޑެލިވަރީ މޮޑަލިޓީގެ ދަށުން ހިންގުމަށް އިސްތިހާރު ކޮށްފައިވާ ކަން ފެންނަ ކަމަށް ވެސް އެމްކިއުއޭ އިން ބުނެފައިވެއެވެ.

އެމްކިއުއޭ އިން ކްލިކް ކޮލެޖަށް އަޅާފައިވާ ފިޔަވަޅުތަކުގެ ތެރޭގައި ރާއްޖޭގެ ގައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުމާއި، އެކްރެޑިޓްނުކޮށް މަތީ ތައުލީމުގެ ޕްރޮގްރާމްތައް ހިންގާތީ 10،000ރ. ޖޫރިމަނާ ކުރުމުގެ އިތުރުން އެ ޕްރޮގްރާމްތައް ހުއްޓާލަން އެންގުމާއި، ސަނަދު ދިނުމުގެ ހުއްދަ ދޫނުކުރުމުގެ އިތުރުން އެ ޕްރޮގްރާމެއް ހިންގަނީ ރާއްޖޭގެ ގައުމީ ސަނަދުތަކުގެ އޮނިގަނޑާ އެއްގޮތަށް ނޫން ކަމާއި ޕްރޮގްރާމް އެކްރެޑިޓޭޝަންގެ މިންގަނޑުތަކާ ހިލާފަށް ކަން އާންމުކޮށް އިއުލާނުކުރުން ހިމެނެއެވެ.

އެވިޑް ކޮލެޖާ މެދު އެމްކިއުއޭ އިން ފިޔަވަޅު އަޅާފައި ވަނީ އެ ކޮލެޖުން ހިންގަމުން އަންނަ ގިނަ ޕްރޮގްރާމްތަކަކާ ބެހޭ ގޮތުން އެ އޮތޯރިޓީ އަށް ގިނަ އަދަދެއްގެ ޝަކުވާ ލިބުމަށް ފަހުގައި ކަމަށް އެމްކިއުއޭއިން ވަނީ ހާމަކޮށްފައެވެ. އެގޮތުން ލެކްޗަރާ އިންނަށް މުސާރަ ނުދިނުމާއި ދަރިވަރުންގެ އިމްތިހާން ކަރުދާސްތައް ބައެއް ލެކްޗަރާއިން މާކް ނުކުރުމުގެ ސަބަބުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުން އިތުރަށް ފައިސާ ދައްކަން ޖެހުން ހިމެނެއެވެ.

އެމްކިއުއޭ އިން ހާމަކޮށްފައިވާ ގޮތުގައި އެވިޑް ކޮލެޖްގެ ހަތް ޕްރޮގްރާމެއްގެ "ރެންޑަމް ބެޗް އޮޑިޓް" ވަނީ ކުރިއަށް ގެންގޮސްފައެވެ. އެގޮތުން، އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ހިލާފަށް ގިނަ ކަންތައްތަކެއް އެވިޑް ކޮލެޖުން ކޮށްފައިވާކަން ފާހަގަ ކުރެވިފައިވާ ކަމަށް އެމްކިއުއޭ އިން ބުނެފައިވެއެވެ.

އެމްކިއުއޭ އިން ކޮށްފައިވާ އޮޑިޓްތަކުން ފާހަގަކޮށްފައިވާ ބައެއް މައްސަލަތަކުގެ ތެރޭގައި ބިފޯ ކޮމެންސިން ފޯމް ފޮނުވަންޖެހޭ މުއްދަތުގެ ތެރޭގައި ފޮނުވަމުން ނުދިއުމާއި ދަރިވަރުން އެންރޯލްކޮށްފައިވާ ތާރީހާއި އިންޓޭކް ތާރީހާ ދިމާނުވުމާއި، ދަރިވަރުންގެ ހާޒިރީ ބަލަހައްޓާނެ އެކަށީގެންވާ ރަނގަޅު ނިޒާމެއް ނެތުމާއި ދަރިވަރުންގެ ނަތީޖާ ޝީޓްތައް ބަލަހައްޓާނެ އެކަށީގެންވާ ރަނގަޅު ނިޒާމެއް ނެތުމާއި، އީ ލާނިން ގައިޑްލައިންގައިވާ ގޮތުގެ މަތިން ލާނިން މެނޭޖްމަންޓް ސިސްޓަމެއް ނެތުމުގެ އިތުރުން ޕްރޮގްރާމް އެކްރެޑިޓޭޝަނާ އެއްގޮތަށް ޕްރޮގްރާމްތައް ނުހިންގުން ހިމެނެއެވެ.

މީގެ އިތުރުން އެވިޑް ކޮލެޖްގެ މައްޗަށް އަޅާފައިވާ ފިޔަވަޅުތަކުގެ ތެރޭގައި ގައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުމާއި އިތުރު ޕްރޮގްރާމަކަށް އެކްރެޑިޓޭޝަނާއި ހިންގުމުގެ ހުއްދަ ދޫ ނުކުރުން ހިމެނެއެވެ.

އެމްކިއުއޭ އިން ވަނީ އެވިޑް ކޮލެޖުން ޕްރޮގްރާމް ހިންގަނީ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑާ އެއްގޮތަށް ނޫން ކަމަށާއި ޕްރޮގްރާމް އެކްރެޑިޓޭޝަންގެ މިންގަނޑުތަކާ ހިލާފަށްކަން އާންމުކޮށް އިއުލާން ކުރަން ވެސް އެވިޑް ކޮލެޖަށް އަންގާފައެވެ.

އެމްކިއުއޭއިން ވަނީ އޮންލައިންކޮށް ހުއްދަ ނެތި ކޯސްތައް ހިންގާ ތަންތަނުގެ މައްޗަށް ފިޔަވަޅު އަޅާނެ ކަމަށް ވެސް މިއިއުލާނުގައި ބުނެފައެވެ.