އެޗްޑީސީގެ ބެލުމުގެ ދަށުން ވިނަރެސް ފްލެޓްގެ ފަހަތުގައި ހުރި އެކޮމޮޑޭޝަން ބްލޮކް ސާފުކުރުވައިފިއެވެ.

އެޗްޑީސީ އިން ހާމަކޮށްފައިވާ ގޮތުގައި ހުޅުމާލޭ 2 ވަނަ ފިޔަވަހީގެ ވިނަރެސް ސަރަހައްދުގައިވާ ވަގުތީ ސައިޓެއްގައި ސާފުތާހިރުކަން ކުޑަކޮށް ކާބޯތަކެތި ތައްޔާރު ކުރަމުންދާ ކަމުގެ ޝަކުވާ ލިބުމުން އެމައްސަލަ ބެލުމަށްފަހު މިހާރު ކޮންޓްރެކްޓަރާއި ވާހަކަ ދައްކައިގެން އެކަންތައް ހުއްޓުވާފައިވާ ކަމަށެވެ. އަދި އެތަން މިހާރު ސާފުކޮށްފައިވާ ކަމަށް ވެސް އެޗްޑީސީ އިން ވަނީ ބުނެފައެވެ.

މިމައްސަލަ އާއި ގުޅިގެން އިމިގްރޭޝަނުން ވަނީ ވިނަރެސް ފްލެޓްގެ ފަހަތުގައިވާ އެކޮމޮޑޭޝަން ބްލޮކެއްގައި ގަވާއިދާ ހިލާފަށް ބިދޭސީން އުޅެމުންދާ ކަމަށް އެ އިދާރާއަށް ލިބުނު މައުލޫމާތާ ގުޅިގެން އެތަން ބަލައި ފާސް ކޮށްފައެވެ.

Advertisement

އިމިގްރޭޝަނުން ބުނެފައިވާ ގޮތުގައި އެތަން ބަލާ ފާސްކުރި ވަގުތު އެ ތަނުގައި ތިބި ބިދޭސީންގެ ތެރެއިން ސައްހަ ވިސާއެއް ނެތް 2 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.

މީގެ އިތުރުން، އެ ތަނަކީ ސާފުތާހިރުކަމަށް އެއްވެސް ސަމާލުކަމެއް ނުދީ، އިޖުތިމާއީ މިންގަނޑާ މުޅިން ހިލާފަށް ބިދޭސީން އެމީހުންގެ ދިރިއުޅުމުގެ ކަންކަމާއި ކެއުމުގެ އިންތިޒާމް ހަމަޖައްސާފައިވާ ތަނެއް ކަމަށާއި. އެކަން ކަމާބެހޭ އިދާރާތަކުގެ ސަމާލުކަމަށް މިހާރު ގެނެސްފައިވާ ކަމަށް އިމިގްރޭޝަނުން ބުނެފައިވެއެވެ.