ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީގެ ރަސްމީ މެއިލްގައިވާ މެއިލްތަކެއް ޑިލީޓް ކުރި މައްސަލައެއް ފުލުހުން ބަލަން ފަށައިފި އެވެ.

ފުލުހުން މީޑިއާތަކާއި ހިއްސާ ކުރެއްވި މެސެޖެއްގައި ބުނެފައި ވަނީ ކުރީގެ އެޑިއުކޭޝަން މިނިސްޓަރު ބޭނުން ކުރެއްވި ރަސްމީ އީމެއިލް އެކައުންޓުގައިވާ  މެއިލްތަކެއް ޑިލީޓް ކުރި މައްސަލައެއް އެޑިއުކޭޝަން މިނިސްޓްރީން މިމަހުގެ 25 ވަނަ ދުވަހުގައި އެއިދާރާއަށް ހުށަހަޅާފައިވާ ކަމަށެވެ.

އެޑިއުކޭޝަން މިނިސްޓްރީން މިމައްސަލަ ވީހާވެސް އަވަހަށް ބަލައިދިނުމަށް އެދިފައިވާ ކަމަށާއި މިހާރު ފުލުހުން ދަނީ މިމައްސަލަ ތަހުގީގު ކުރަމުން ކަމަށް ފުލުހުން ތަރުޖަމާނު އެސިސްޓެންޓް ކޮމިޝަނާ އޮފް ޕޮލިސް، އަހުމަދު ޝިފާން ވިދާޅުވިއެވެ.

Advertisement

މިމައްސަލަ ފުލުހުން ތަހުގީގު ކުރަމުންދާއިރު، ޑރ. އައިޝަތު ފޭސްބުކްގައި ކުރެއްވި ޕޯސްޓެއްގައި ވިދާޅުވީ އޭނާ މިނިސްޓަރު ކަމުގައި ބޭނުންކުރެއްވި އީމެއިލް މިދިޔަ އަހަރުގެ ނޮވެމްބަރު  17 ގައި  ޑީއެކްޓިވޭޓް ކޮށްފައިވާ ކަމަށެވެ. އަދި އެހެން ފަރާތަކުން އެއީމެއިލްއަށް މިއަދުގެ 3:15 ގައި ވަންނަން މަސައްކަތް ކޮށްފައިވާކަން ދައްކުވައިދޭ ސްކްރީންޝޮޓްއެއް ހިއްސާ ކުރައްވަމުން އޭނާ ވިދާޅުވީ އެ އީމެއިލްއަށް ވަންނަން ކޮންމެވެސް ފަރާތަކުން މަސައްކަތް ކޮށްފައިވާ ކަމަށެވެ.

އޭނާ އިތުރަށް ވިދާޅުވީ މިދިޔަ އަހަރުގެ ނޮވެމްބަރު 17ގެ ފަހުން އެ އެކައުންޓުން އެއްވެސް ފަރާތަކަށް އީމެއިލްއެއް ލިބިފައި ވާނަމަ އެއީ އޭނާ ފޮނުވި މެއިލް ނޫން ކަމަށެވެ.