މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ހަވާލުވެފައި އަމަލީ މަސައްކަތް ފަށާފައި ނުވާ  މަޝްރޫއުތައް ނުފަށަން އިންފްރާސްޓްރަކްޗާ މިނިސްޓްރީން އެ ކުންފުންޏަށް އަންގައިފިއެވެ.

އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މިރޭ އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ އެމްޓީސީސީން ސޮއިކޮށް އަމަލީ މަސައްކަތް ނުފެށިވާ މަޝްރޫއުތައް މިވަގުތައް ނުފަށައި އަމަލީ މަސައްކަތް ފަށާފައިވާ މަޝްރޫއުތައް ނިންމުމަށް އިސްކަން ދިނުމަށް ނިންމާފައިވާ ކަމަށެވެ.

މިނިސްޓަރު އިތުރަށް ވިދާޅުވީ އެމްޓީސީސީއާ ހަވާލުކޮށްފައިވާ މަޝްރޫއުތަކުގެ ތެރެއިން އަމަލީ މަސައްކަތް ފެށިފައިވާ އެއްވެސް މަޝްރޫއެއް މަޑުޖައްސާލަން ސަރުކާރުން ނިންމާފައި ނުވާ ކަމަށެވެ.

Advertisement

މިފަދައިން ނިންމުމުގެ މައިގަނޑު މަގްސަދަކީ އެ މަޝްރޫއުތައް ކުރިއަށް ގެންދަން ބޭނުންވާ މިންވަރަށް މިއަހަރުގެ ބަޖެޓުގައި ފައިސާ ހިމަނާފައި ނުވާތީ ކަމަށް މިނިސްޓަރު ވިދާޅުވި އެވެ.

މިނިސްޓަރު މިފަދައިން އެކްސްގައި ޕޯސްޓް ކުރެއްވީ ރާއްޖޭގެ އޮންލައިން ބައެއް ނޫސްތަކުން އެމްޓީސީސީން އަމަލީ މަސައްކަތް ފަށައިފައިވާ މަޝްރޫއުތައް ހިމެނޭ ގޮތަށް މަޝްރޫއުތަކެއް މަޑުޖައްސާލަން މިނިސްޓްރީން އަންގައިފައިވާ ކަމަށް ރިޕޯޓުކުރުމާ ގުޅިގެންނެވެ.