މިނިވަންދުވަހުގެ މުނާސަބަތުގައި އަންނަ ހަފްތާގެ ހުކުރު ދުވަހު ބޭއްވުމަށް ހަމަޖެހިފައިވާ ޕެރޭޑު އޮންނަ ވަގުތު މާލޭގައި އެއްގަމު އުޅަނދު ދުއްވުން މަނާކޮށްފިއެވެ.

މާލެ ސިޓީ ކައުންސިލުން އާންމުކުރި އިއުލާނެއްގައި ބުނެފައިވާ ގޮތުގައި 59 ވަނަ މިނިވަން ދުވަހުގެ މުނާސަބަތުގައި ގައުމީ ކެޑޭޓް ކޯ އާއި މޯލްޑިވްސް ނެޝަނަލް ޑިފެންސް ފޯސްއިން އެއް ވަގުތެއްގައި މާލޭގެ ބޮޑެތި މަގުތަކުގައި ހިނގާލުމެއް ކުރިއަށް ގެންދިއުމަށް ހަމަޖެހިފާ ކަމަށެވެ.

އެހެންކަމުން އެ ހިނގާލުން ކުރިއަށްދާ ވަގުތު މާލޭގެ މަގުތަކުގެ ޓްރެފިކަށް ބާރު ބޮޑުވާނެތީވެ ހުކުރު ދުވަހުގެ ހަވީރު 16:00އިން 18:00އަށް މާލޭގައި އެއްގަމު އުޅަނދު ދުއްވުން މަނާ ވަގުތެއްގެ ގޮތުގައި ހަމަޖައްސަވާފައިވާ ކަމަށެވެ.

Advertisement

މިނިވަންދުވަހުގެ މުނާސަބަތުގައި ބާއްވާ ޕެރޭޑް ފުރަތަމަ ބާއްވަން ހަމަޖެހިފައި އޮތީ މިދިޔަ ހަފްތާގެ ހުކުރުދުވަހު އެވެ. އެހެންނަމަވެސް މޫސުން ގޯސްވުމާއި ގުޅިގެން އަންނަ ހުކުރު ދުވަހަށް ޕެރޭޑް ފަސްކުރީ އެވެ.

މިނިވަން ދުވަހުގެ މުނާސަބަތުގައި ކޮންމެ އަހަރަކުވެސް އެކި ހަރަކާތްތައް ކުރިއަށް ގެންދެއެވެ. އެހެންނަމަވެސް ސަރުކާރުން ވަނީ ރާއްޖޭގެ އިގްތިޞާދީ ހާލަތު އޮތް ގޮތުން ތަފާތު މުނާސަބަތުތަކުގައި ބާއްވާ ހަފްލާތަކަށް ޚަރަދު ކުޑަކުރުމަށް ނުވަތަ ނުބޭއްވުމަށް އަންގާފައެވެ.