ނައިޓް މާރކެޓް ނުވަތަ މަގުމަތީ ބާޒާރު ބޭއްވުމުގުގެ ހުއްދަ ދޫކުރެވޭނީ ގިނަވަގެން 10 ދުވަހަށް ކަމަށް އިގުތިސާދީ ތަރައްގީއާއި ވިޔަފާރިއާ ބެހޭ ވުޒާރާއިން ވިދާޅުވެއްޖެއެވެ.

އެވުޒާރާއިން ފެއަރ، ނައިޓްމާރކެޓް ނުވަތަ މަގުމަތީބާޒާރު ހިންގުމުގެ ހުއްދަ ދޫކުރުމުގައި އަމަލުކުރާނެ އުސޫލަށް އިސްލާހް ގެނެސް މިއަދު ސަރުކާރުގެ ގެޒެޓްގައި އާންމު ކުރި އިއުލާންގައި އެއުސޫލަށް 30 ޖުލައި އިން ފެށިގެން އަމަލުކުރަން ފަށާނެ ކަމަށް ބަޔާންކޮށްފައިވެ އެވެ.

މީގެ އިތުރުން މި ގޮތަށް ވިޔަފާރި ކުރެވޭނީ ރާއްޖޭގައި ރަޖިސްޓަރީ ކޮށްފައިވާ ވިޔަފާރިއެއް ނުވަތަ ޖަމިއްޔާއަކަށް ކަމަށާއި އިމްޕޯޓު މުދަލުގެ ވިޔަފާރި ކުރެވޭ ގޮތަށް ނައިޓް މާކެޓް ބާއްވަންޖެހޭނީ ވަކި މުނާސަބަތަކާ ގުޅިގެންކަމަށް މިއުސޫލުގައި ބަޔާންކޮށްފައިވެއެވެ.

Advertisement

މިއުސޫލުގައި ކަނޑައަޅާފައިވާ ގޮތުގެ މަތީން ފެއާ، ނައިޓްމާކެޓް ނުވަތަ މަގުމަތީބާޒާރުގައި ކެއުމުގެ ބާވަތްތައް ވިއްކާ ނަމަ، ރަޖިސްޓަރީ ކުރާ ކުންފުނި ނުވަތަ ޖަމިއްޔާއިން އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން ނަގަން ޖެހޭ ހުއްދަ ނަގާފައިވޭތޯ ކަށަވަރު ކުރަން ޖެހެއެވެ. އަދި ވިއްކާ ހުރިހާ މުދަލެއްގައި ވެސް އާންމުންނަށް ފެންނާނެހެން އަގު ޖަހައިފައި ހުންނަން ޖެހޭނެއެވެ.

ނައިޓް މާކެޓަކީ ދިވެހީންގެ ތެރޭގައި ބޮޑު ތަރުހީބެއް ލިބޭ އިވެންޓް އެކެވެ. މިއުސޫލަށް ގެނެވުނު ބަދަލާއި އެކު ނައިޓް މާކެޓް ހުއްދައަށް އެދި ހުށަހަޅަން ޖެހޭނީ އިގްތިސާދީ ވުޒާރާއަށް އޮންލައިން ފޯމެއް މެދުވެރިކޮށެވެ.