ވިނަރެސް ފުލެޓު ކައިރީގައި ބާރު ސްޕީޑްގައި ދުއްވާފައި ގޮސް ސައިކަލެއްގައި ޖެހި އެކްސިޑެންޓުވި ކާރު ދުއްވަން އިން ތިން މީހުން ފުލުހުން މިރޭ ހައްޔަރު ކޮށްފިއެވެ.

ފުލުހުން ވަނީ ހުޅުމާލެ ވިނަރެސް ފްލެޓުތައް ކައިރި ހިނގި ނުރައްކާތެރި އެކްސިޑެންޓާއި ގުޅިގެން ހައްޔަރުކޮށްފައިވާ ތިން މީހުންގެ ވަނަވަރު މިރޭ އެކްސްގައި ހިއްސާކޮށްފައެވެ.

އެގޮތުން ފުލުހުން ހާމަކޮށްފައިވާ ގޮތުގައި މިމައްސަލަ އާއި ގުޅިގެން ފުލުހުން ހައްޔަރު ކޮށްފައިވަނީ ކ. މާލެ، ހ. ނޫރަންމާގެއާގެ/ އިކްރާމުއްރަހްމާން، ކ. މާލެ، މ. ލޭންޑްއޮފްގާރޑްން/ އިބްރާހީމް އިކްރާމް އަދި ގއ. ކަނޑުހުޅުދޫ، އާޒާދުގެ/ ޖިނާހް އިސްމާޢީލް އެވެ.

Advertisement

މިތިން މީހުން ވަނީ އެކްސިޑެންޓްވުމުން ފިލާފައެވެ. ފުލުހުން މީޑިއާ އާއި ހިއްސާކޮށްފައިވާ މެސެޖެއްގައި ބުނެފައިވަނީ އެކްސިޑެންޓުވި ވަގުތު ކާރު ދުއްވަން އިނުމަށް ފަހު ފިލައިގެން ދިޔަ އުމުރުން 25 އަހަރުގެ ފިރިހެނެއް ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ. އަދި އޭގެ ފަހުން ކާރުގައި ދެން ތިބި ދެ ފިރިހެނުންވެސް ހައްޔަރުކޮށް ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ބުނެފައިވެއެވެ.

މިއެކްސިޑެންޓްގެ ވީޑިއޯތައް ސޯޝަލް މީޑިއާގައި ދައުރުވެފައިވާއިރު، ވީޑިއޯއިން ފެންނަނީ ބާރު ސްޕީޑްގައި ދުއްވާފައި ދިޔަ ކާރެއް ގޮސް ވިނަރެސް ފްލެޓް ކުރިމަތީގައި ޕާކްކޮށްފައި ހުރި ސައިކަލެއްގައި ޖެހޭތަނެވެ. އަދި އެއާއިއެކު ސައިކަލުގައި އިން 27 އަހަރުގެ ޒުވާނާ ވިއްސައިގެންދާ ތަން ވެސް ފެނިގެންދެއެވެ.

މިއެކްސިޑެންޓްގައި އަނިޔާވި ޒުވާނާއަށް އައިޖީއެމްއެޗް ހޮސްޕިޓަލުގައި ފަރުވާދެމުންދާއިރު، އޭނާގެ އާއިލާއިން ހާމަކޮށްފައިވާ ގޮތުގައި އޭނާގެ މޫނުގެ ކަށިތައް ވަނީ ބިނދިފައެވެ. މީގެއިތުރުން، އޭނާގެ ހާލު މިހާރު ރަނގަޅުވަމުން އަންނަ ކަމަށްވެސް އާއިލާއިން ވަނީ ބުނެފައެވެ.